Full alert sa Manila Police sa Pista ng Nazareno

Inilagay na sa "full alert status" ni Manila Police District Director C/Supt. Pedro Bulaong ang buong puwersa ng pulisya kaugnay ng pagdiriwang ng Pista ng Itim na Nazareno sa darating na Lunes.

Sinabi ni Bulaong na nakaalerto na ngayon ang pulisya partikular na ang Station 3 (Sta. Cruz) na nakakasakop sa Quiapo upang bantayan na ang Basilica de Dios Nazareno na inaasahang dudumugin ng libu-libong deboto.

Kabilang sa babantayan ng pulisya ang posibilidad na magkaroon ng pagsalakay ng mga terorista, mga kriminal sa kalsada at pagbabantay sa mga personalidad na nakikidiwang kabilang na si Vice President Noli de Castro na kilalang deboto ng Itim na Nazareno.

Nakaumang na rin ang traffic measures ng Manila Traffic Bureau tulad ng mga re-routing sa mga kalsada patungo sa Simbahan.

Katuwang ng pulisya ang mga traffic agent ng Manila City Hall at Metropolitan Manila Development Authority (MMDA).

Naging tradisyon na tuwing sasapit ang Enero 9, inilalabas ang Poong Nazareno. Naniniwala ang mga deboto na sinuman ang makakahawak sa Poon ay gagaling ang anumang karamdaman.

Base sa kasaysayan, nagbuhat sa bansang Mexico ang Poong Nazareno na dinala sa Pilipinas ng isang pari noong 1606. Una itong namalagi sa Quiapo Church noong 1787 kung saan pinaniniwalaan na maraming himala itong nagawa. (Danilo Garcia)