Tax sa cellphone tuloy–Palasyo

Hindi iuurong ng Arroyo government ang plano nitong patawan ng buwis ang mga cellular phone pero humahanap sila ng paraan upang hindi maapektuhan ang mga cellphone users para sa karagdagang pasanin.

Ito ang naging reaksyon ni Finance Secretary Juanita Amatong sa napaulat na pagbabago ng pasya ng gobyerno kaugnay sa planong karagdagang buwis sa telecommunication.

Ayon kay Sec. Amatong, intensyon ng Department of Finance (DOF) na isulong ang panukalang batas na ito sa pakikipagtulungan ng Kongreso upang makakalap ng karagdagang buwis ang pamahalaan.

"An equitable tax on telecommunication companies continues to be in the priority legislative agenda of the administration although it has been placed in the short-term backburner in favor of more practical and feasible tax measures that would respond to the congressional calendar and the need to quickly put our fiscal house in order," wika pa ni Amatong.

Sinabi naman ni DOF Undersecretary Grace Tan ng dumalo ito sa pagdinig ng House committee on ways and means kamakailan, sinabi nitong pinag-aaralan nila ang isyu ng pagpapataw ng karagdagang buwis sa pamamagitan ng isang bagong telEcommunications tax.

Naghayag ng reserbasyon ang DOF sa panukalang muling patawan ng franchise tax ang telecommunications kapalit ng Value Added tax (VAT).

"We have reservations on the proposed reimposition of the franchise tax on telecos in lieu of the VAT because this would result in lower tax revenue for the government," wika pa ni Usec. Tan. (Lilia Tolentino)