Mga hukuman naparalisa

Paralisado ang pag-inog ng hustisya kahapon matapos ituloy ang bantang mass leave ng mga empleyado ng korte sa buong bansa.

Sa pahayag ng Philippine Confederation of Court Employees Association (PHILCONCEA), hindi lang dapat ang mga sundalo ang binibigyang pansin ng gobyerno dahil may karapatan din silang mag-aklas kung patuloy na babalewalain ng gobyerno ang kanilang karaingan.

Ayon sa tagapagsalita ng grupo na si Manila Regional Trial Court Judge Antonio Eugenio, ilang ulit na nilang hinihingi sa gobyerno na bigyan ng mas mataas na allocation budget ang sangay ng hudikatura dahil marami ng nagsialis na mga empleyado, abogado at hukom bunga ng sobrang liit ng pinasusuweldo ng gobyerno.

Sa taong ito ay 0.9 percent lamang ang ibinibigay na budget para sa hudikatura, P7.8B mula sa P865-B national budget.

Bunga ng sobrang liit ng budget ay hindi na umano natutugunan ang mga pangangailangan ng hudikatura tulad ng pagkakaroon ng maayos na salas at opisina.

Dahil din sa kakulangan ng pasilidad, empleyado at hukom ay napagkakaitan ang halos 30 milyong Filipino ng mabilis na pagkakaroon ng hustisya.

"Biruin ninyo, sa dami ng kaso sa bansa, sa isang judge tatlong sala ang dapat hawakan, sa isang sala ilang kaso ang hawak, paano mapapabilis ang gulong ng hustisya?" ani Eugenio.

Binigyang-diin pa ng grupo na hindi lamang ang mga sundalo tulad ng grupong Magdalo ang dapat na pakinggan at ibigay ang pangangailangan kundi maging ang hudikatura na mayroong sensitibong trabaho gaya ng una. (Ulat ni Grace dela Cruz)