Impeachment sa SC justices 'papatayin' sa Senado

Tiniyak kahapon ng administration senators na hindi makakarating sa Senado ang impeachment complaint na inihain sa Kamara laban sa walong Supreme Court (SC) justices kabilang na si Chief Justice Hilario Davide Jr.

Nagkakaisa ng pahayag sina Senate President Franklin Drilon, Senators Joker Arroyo at Francis Pangilinan na hindi makaka-first base ang impeachment complaint na inihain ni dating Pangulong Estrada.

Ayon sa mga senador, ang isinampang reklamo laban kina Davide at Associate Justices Artemio Panganiban, Josue Belosillo, Antonio Carpio, Renato Corona, Reynato Puno, Leonardo Quisumbing at Jose Vitug ay bahagi lamang ng political destabilization upang gumuho ang legitimacy ng administrasyong Arroyo.

Ani Drilon, walang basehan ang reklamo sa SC justices dahil ang legitimacy ng kasalukuyang gobyerno ay kinikilala ng lahat ng sektor ng lipunan partikular na ang Kongreso at ang international community.

Sa reklamong inihain ng abogado ni Estrada na si dating Sen. Rene Saguisag, ipinaliwanag nito na ang walong mahistrado ay nakagawa ng culpable violation of the consitution and betrayal of public trust dahil ipinagbabawal sa judicial rule ang pagsama ng court officers sa mga rali, tulad ng ginagawang pagpapanumpa ni Davide kay Arroyo bilang pangulo ng bansa noong kasagsagan ng People Power 2 na isa umanong political partisan. (Ulat ni Rudy Andal)