25 bansa na ang biktima ng SARS

Umabot na sa 25 bansa sa buong mundo kabilang ang Pilipinas ang nakapagtala na ng positibong kaso ng Severe Acute Respiratory Syndrome (SARS).

Ayon sa World Health Organization (WHO), pinangangambahan nito na maaari pang lumawak sa buong mundo ang pagkalat ng epidemya dahil sa mabilis na pagkalat ng nasabing sakit na hindi pa natutuklasan ang lunas.

Ang Hong Kong ang nangunguna sa listahan ng WHO na may pinakamataas na bilang ng nasawi sa SARS. May 81 katao na ang nasawi doon at umaabot sa 1,358 ang may sakit nito.

Sa Estados Unidos, 220 ang hinihinalang may SARS habang 86 katao ang probable case nito.

Sa Singapore, may 1777 ang may SARS at 16 ang naitalang patay dito.

Umaabot naman sa 1,512 kaso ng SARS sa China, 65 ang patay; 132 kaso sa Canada; 5 SARS case sa France, anim sa Germany, tatlo sa Italy; dalawa sa Japan, isa sa Malaysia, tatlo sa Australia, 1 sa Pilipinas at 29 sa Taiwan, pawang wala pang naitatalang namamatay sa SARS.

Sa Singapore mayroon ng isang herbal medicine na pinaniniwalang maaaring panlaban sa SARS. (Ulat ni Jhay Mejias)