Dagdag-bawas inuumang daw ng oposisyon

Kabi-kabilang panggagapang ang isinasagawa umano ngayon ng oposisyong Puwersa ng Masa para maiumang sa lalong madaling-panahon ang pinaplano nilang dagdag-bawas sa halalan sa Mayo.

Sinabi kahapon ni People Power Coalition Spokesman Dodi Limcaoco na nakatanggap sila ng impormasyon na pinaplanong mandaya ng mga kandidato ni dating Pangulong Joseph Estrada.

Isinasagawa umano ng oposisyon ang plano kasunod ng resulta ng isang survey noong Pebrero 22-25 na walong kandidatong senador ng PPC ang pumasok sa magic 12 samantalang lima ang mula sa PnM. Umangat sa survey sina Wigberto Tañada, Roberto Pagdanganan, Ernesto Herrera, at Liwayway Chato samantalang palubog sina Juan Ponce Enrile, Gregorio Honasan, Orlando Mercado, Ricardo Puno at Miriam Santiago.

Sinabi ng PPC na mga datihan na raw sa usaping dagdag-bawas mula sa hanay ni Estrada ang kumikilos para makalamang ang PnM. (Ulat ni Angie Dela Cruz)