Jaguars mosakbang batok sa Wildcats

Tanang upat ka lider sa juniors division mokumbati karon

CEBU, Philippines — Human nahunong og usa ka adlaw tungod sa dili maayong panahon nga gidala sa bagyong Kristine, mobalik na ang aksiyon sa Cebu Schools Athletic Foundation, Inc. (CESAFI) Season 24 basketball tournament karong adlawa uban ang upat ka mga duwa diha sa Cebu Coliseum.

Sa bugtong sangka sa collegiate level nga gikatakda sa alas-5 sa hapon, ang University of San Jose-Recoletos (USJ-R) Jaguars makigpinaksitay sa Cebu Institute of Technology-University (CIT-U) Wildcats.           

Ang Jaguars anaa karon sa ikaupat nga puwesto sa standings bitbit ang 3-2 win-loss record, samtang ang Wildcats kausa pa lamang makadaog sud sa upat ka sinugdanan.

Kon ugaling molampus, ang Jaguars segurado na og luna sa Final Four.

Sa juniors division, ang two-time defending champion Sacred Heart School-Ateneo de Cebu (SHS-AdC) Magis Eagles ug ang University of the Visayas (UV) Baby Lancers mag-abot sa seguradong eksplosibo nga engkwentro sa alas 3:30 sa hapon.

Sa kasamtangan, ang Magis Eagles ug ang mainit nga karibal nilang Baby Lancers nagtabla ug ang USJ-R Baby Jaguars ug University of Cebu (UC) Baby Webmasters sa kinatas-ang dapit sa liderato uban ang managsamang 5-1 nga baraha.

Sama sa Magis Eagles ug Baby Lancers, ang Baby Jaguars ug Baby Webmasters naglaraw sab nga mokulit sa ikaunom nilang daog batok sa managlahing kontra karong hapon.

Ang Baby Jaguars makigharong sa CIT-U Baby Wildcats sa alas-2 sa hapon, samtang ang Baby Webmasters makigtige sa University of San Carlos (USC) Baby Warriors sa pasiunang duwa sa alas 12:30 sa hapon.

Ang Baby Wildcats nagtangag karon og 4-2 nga marka samtang ang Baby Warriors bokya pa gihapon sa lima ka duwa.