Sa amihanang bahin sa sugbo Bogo City FC Mipalambo sa grassroots football

CEBU, Philippines — Hinay-hinay apan sa kanunay, ang Bogo City Football Club mipaduol ngadto sa pagkab-ot sa ilang misyon nga mao ang pagsabwag ug pagpalambo sa grassroots football didto sa amihanang bahin sa Sugbo.

Mao kini ang tinguha nilang Lowell Ferrer, Shero John Maceda, ug Jan Ray Mikelle Aninipoc sa pagtukod sa Bogo City FC niadtong Agosto 2023.

Abli sa mga mahiligon og soccer gikan sa mga bata nga nag-edad pa og tres anyos, si Ferrer nagkanayon nga gusto nilang makahatag og plataporma sa katawhan nga makaduwa og football, mabaid ang ilang abilidad, ug malingaw ning matang sa paugnat sa kusog.

"Open ni ang among club as tanan nga gustong makat-on, mo-enjoy sa football pero gihatagan nato og dakong priority ang mga grassroots level as early as three years old," matud pa ni Ferrer, ang external affairs manager sa Bogo City FC.

Gikan sa gamayng numero sukad sa ilang pagsugod, si Ferrer mibutyag nga mitubo na sila karon ngadto sa kapin sa 120 ka miyembro.

Mipahigayon sila og nagkadaiyang mga aktibidades aron magpabiling aktibo ang ilang grupo.

Apil niini ang pagtabang sa pipila ka mga Bogohanon volunteer coaches nga makakuha og PYCC (Philippine Youth Coaching Certificate), pag-awhag sa mga estudyante gikan sa nagkalain-laing tunghaan sa Bogo nga moapil sa ilang programa uban ang suporta sa ilang mga ginikanan, ug pagsalmot sa mga kompetisyon sama sa CIS Cup, Toledo City Cup ug uban pa.

Dugang niini, ang Bogo FC miimbita og 10 ka mga coaches gikan sa Central Visayas Football Association (CVFA) ug ingon man sa inilang coach nga si Glenn Ramos ug sa Don Bosco FC aron mopasiugda og training sa mga batan-on nilang magduduwa.

Ning bag-ohay pa lamang, si Ferrer mipahibawo nga milampos sila pagpadagan sa usa ka grassroots nga torneyo diin nangapil ang mga football clubs gikan sa Carmen, Danao, Talisay, ug Toledo.

Samtang nagbaid ug nag-ugmad sa batan-ong mga talento, si Ferrer nanghinaut nga makaplastada sila og bantawan   alang sa maayong ugma sa ilang mga magduduwa pinaagi sa ilang abilidad.

"Amo gyud tumong nga mailhan ug ma-introduce ang beautiful game of football sa mga kabataan. Mahimo usab kini nga additional sports option to the community dili lang sa Bogo City but also sa mga silingan nga municipalities," padayag pa ni Ferrer.

"Pinaagi sa sports in general, mahilayo nato ang kabataan sa mga dili maayong butang sama sa mga ginadili nga droga, mga gang ug uban pa. We are also encouraging nga ang football diri sa amoa nga family oriented siya. Our ultimate goal is maka-develop og maayong mga players ug mahatagan og opportunity puhon atong mga bata to attend well-known schools anywhere," panapos pa ni  Ferrer.