Bucks, Suns, Warriors gisubhan og daog

CEBU, Philippines — Si Damian Lillard miharos og 30 puntos samtang si Giannis Antetokounmpo midugang og 25 puntos, 14 ka rebounds ug pito ka assists sa dihang ang Milwaukee Bucks miligid ngadto sa 124-109 nga kadaogan batok sa Philadelphia 76ers sa una nilang duwa ning lab-as nga NBA season kagahapong adlawa didto sa Wells Fargo Center sa Philadelphia, Pennsylvania.

Dako sab og naambag sila si Taurean Prince ug Bobby Portis nga mitali og 16 puntos matag usa alang sa Bucks.

Dehado hinoon sa tapad ang Sixers nga mikumbati nga wala ang duha nila ka bitoon nga sila si Joel Embiid ug Paul George kay dunay gihambin nga angol.

Sa laing duwa, si Kevin Durant mikadlit og 25 puntos aron tabangan ang Phoenix Suns nga makalingkawas batok sa Los Angeles Clippers, 116-113, sud sa overtime.

Didto sa Portland, ang Golden State Warriors milusad sa bag-o nilang kampanya nga wala na si Klay Thompson pinaagi sa 139-104 nga demolisyon sa Trail Blazers.

Si Buddy Hield maoy nangu sa Warriors bitbit ang 22 puntos samtang si Stephen Curry mitimnbre og 17 puntos.

Ang No.1 overall draft pick nga si Zaccharie Risacher sa France mihimo dayon og kasikas sa dihang gidagit sa Atlanta Hawks ang Brooklyn Nets, 120-116.

Si Risacher mi-iskor og siyete puntos sa iyang NBA debut uban sa Hawks, nga gipangulohan ni Trae Young nga mibubo og 30 puntos ug mipasa og 12 ka assists.

Gisubhan sab og daog ang Indiana Pacers nga mipaluhod sa Detroit Pistons,115-109.

Si Myles Turner mihipos og 20 puntos samtang si Bennedict Mathurin mitali og 14 sa iyang 19 puntos sa eksplosibong opensiba sa Pacers sa katapusang kuwarter nga maoy nagsalbar kanila.