Gikahinaman nga Palarong Pambansa mo-arangkada na

CEBU, Philippines — Ang takna nga gipaabot sa mga Sugbuanon niabot na kini tungod kay ang gikahinaman nga 64th Palarong Pambansa nga nibalik sa Dakbayan sa Sugbo sa labing unang higayon sud sa 30 ka tuig mosikad na pinaagi sa usa ka bongga ug engrandeng seremonyas nga magsugod pinaagi sa tradisyonal nga parada sa mga atleta sa alas-3:00 sa hapon karong adlawa diha sa Cebu City Sports Center.

Si Presidente Ferdinand "Bongbong" Marcos, Jr. ug Bise Presidente Sara Duterte, nga nanamilit na sa iyang pwesto isip kalihim sa Department of Education (DepEd) maoy mangulo sa pormal nga pagbukas sa labing dako nga torneyo nga gilangkuban sa mga estudyanteng atleta sa elementarya ug segundarya gikan sa 17 ka rehiyon sa nasud nga katapusang gipahigayon sa siyudad niadto pang 1994.

Moduyog nilang Marcos ug Duterte sila si Gobernador Gwendolyn Garcia, Acting Cebu City Mayor Raymond Garcia, Acting Vice Mayor Dondon Hontiveros, Cebu City Sports Commission Chairman John Pages ug uban pang halangdon nga mga bisita sa espesyal nga programa nga molamas sa malisud nga kompetisyon sa unahan.

Gisalmotan sa dul-an 12,000 ka atleta, coaches ug opisyal lukop nasud ang aksiyon sa usa ka semana nga kompetisyon moulbo unya pa sa Huwebes, Hulyo 11, 2024 diin 28 ka events nga gikatag sa 30 ka binyu ang kombatehan.

Kini mao ang athletics, archery, arnis, badminton, chess, boxing, baseball, billiards, basketball, chess, dance sport, football, futsal, pencak silat, taekwondo, sepak takraw, softball, swimming, volleyball, wrestling, table tennis, tennis, ug para games.

Makasaysayanon ang Palaro niining tuiga gumikan kay sa labing unang higayon moapil ang duha ka delegasyon gikan sa National Academy of Sports ug Philippine Schools from Overseas.

Ang dance sport usa na ka regular sport hinungdan nga apil na kini sa medal standings.

Adunay smartphone app nga mohatag og real-time updates ug mga mahinungdanong impormasyon kabahin sa prestihiyosong kalihokan sa paugnat sa kusog sama sa overall medal tally sa matag rehiyon ingon man ang tanang mga medalists ug ilang kategoriya, iskedyul ug live streaming sa mga duwa ug uban pa.

Gawas niini, adunay ideklara nga overall champion matag sport ug lain nga medal tally alang sa mga local government units (LGUs) agi’g pahinungod sa ilang kontribusyon ug suporta sa mga atleta nga nipartisipar sa Palaro nga gikatakdang matapos sa Hulyo 16, 2024. (BANAT NEWS)