UC mipadala og delegasyon aron moabiba sa ilang lifters

CEBU, Philippines — Usa ka importanteng byahe alang sa usa ka importanteng tahas.

Sila si University of Cebu Athletic Director Jessica Jawad-Honoridez ug college basketball coach Atty. Kenneth Kernn Sesante milupad og tuyo ngadto sa pamosong capital sa France nga Paris isip kabahin sa delegasyon sa UC nga mo-abiba sa bililhon nilang mga weightlifters nga sila si Elreen Ann Ando ug John Febuar Ceniza nga mokumbati sa Olympic Games.

Mosunod nilang Honoridez ug Sesante didto sa nabantog nga City of Light sila si Atty. Maricar Joy Tallo, ang special assistant ni UC President Candice Gotianuy, ug Atty. Ria Lidia Espina, ang dean sa UC School of Law.

Ang 26-anyos nga si Ceniza, lumad gikan sa Barangay Pasil, dakbayan sa Sugbo, maoy unang mopakita’g aksiyon unya sa Agosto 7 ubos sa men’s 61kg category.

Sunod adlaw (Agosto 8), ang 25-anyos nga si Ando gikan sa Barangay Carreta mao na sab ang mowadwad sa iyang abilidad sa women’s 59kg class.

Si Ceniza, nga two-time Southeast Asian (SEA) Games silver medalist, ug si Ando, nga nakadaog og gold medal sa 2023 Cambodia SEA Games ug silver sa 2024 Asian Weightlifting Championships didto sa Tashkent, Uzbekistan niadtong Pebrero, andam nga mobuhat tanan kutob sa ilang mahimo ilabi na kay si Gotianuy misaad og P1 million nga insentibo sa bisan kinsa nila nga makamedalya.

Sila si Ceniza ug Ando naglangkob sa tulo ka lifters sa 22-man Philippine team nga misalmot sa prestihiyosong torneyo nga mahitabo kausa lamang sud sa upat ka tuig.

Ang lain mao ang Boholana nga si Vanessa Sarno gikan sa dakbayan sa Tagbilaran. Mobanat siya sa Agosto 10 sa women’s 71kg category.