Sugbuanong coach ni Yulo andam motabang pagbaid og mga talento

CEBU, Philippines — Si Allen Aldrin Castañeda, ang Sugbuanong coach ni Paris Olympics double gold medalist Carlos Yulo, mipadayag sa iyang suporta ngadto sa grassroots program sa dakbayan sa Sugbo ubos sa Cebu Gymnastics Academy diha sa Labangon Elementary School.

Kanhi gymnast nga sakop na karon sa coaching staff sa national team, si Castañeda mitabang paggiya ni Yulo ngadto sa makasaysayanong dungog sa Paris Games dul-an sa usa ka bulan na ang milabay.

Atol sa pagbisita niya og balik sa yuta niyang natawhan ning bag-ohay pa lamang, si Castañeda mibutyag nga iyang gidawat ang hagit ni Philippine Sports Commissioner Edward Hayco nga tabangan ang pundok sa mga masaarong gymnasts pagbaid sa ilang abilidad maski kausa lamang sud sa usa ka bulan.

Nagtoo si Castañeda nga ang  Sugbo adunay dakong potensiyal sa gymnastics apan nanginahanglan og tumang kakugi ug taas nga pasensiya aron makahulma og usa ka kampiyon.

“Dili na siya basta-basta, trabahoon gyud na. Daghan ta diri'g potential, kinahanglan tagaan gyud na'g pagtagad,” matud pa ni Casteneda.

Si Castañeda nanghinaut nga ang academy ablihan sa tanan nga mga interesado nga makat-on ug molambo isip gymnast.

“Mo-collaborate ko with the coaches diri,” dugang pa ni Castañeda.

Sa higayon nga makasigpat siya og potensiyal nga mga atleta alang sa national team, si Castañeda mipadayag nga iyang hangyoon ang ilang asosasyon nga hatagan sila og puy-anan ug atimanon ang uban pa nilang panginahanglan samtang anaa sila sa Manila.