Durant nangu sa US team paglampornas sa Serbia

CEBU, Philippines — Ang 14-time NBA All-Star nga si Kevin Durant mikuha dayon og atensiyon sa iyang pagbalik gikan sa injury human gipangulohan ang US team ngadto sa 110-84 nga demolisyon sa Serbia pagsugod sa ilang depensa sa basketball event sa XXXIII Paris Olympics didto sa Pierre Mauroy Stadium sa Lille, France.

Si Durant, nga wala makaapil bisa'g kausa sa praktis sa US Olympic team kay dunay gihambin nga angol, kausa lamang masipyat sa siyam niya ka tira aron pagtapos uban ang 23 puntos sa kumbinsidong kadaogan sa Amerika nga naglaraw sa ikalima nilang sagunson  nga korona sa prestihiyosong torneyo nga mahitabo kausa lamang sud sa upat ka tuig.

Ang 35-anyos nga alas sa Phoenix Suns misud sa duwa sa unang kuwarter diin sila nabiyaan og singko puntos, 19-14.

Apan si Durant, nga kabahin sa Team USA nga nakadaog og gold medal sa tulo ka Olympics niadtong 2012, 2016 ug sa Tokyo tulo ka tuig ang milabaw, nanginit sa kalit lang aron ituboy ang mga Amerikano sa impresibong pagbalitok nga miresulta ngadto sa 26 puntos nilang paglampaso sa Serbia.

Misidlak sab si LeBron James uban ang 21 puntos ingon man sila si Jrue Holiday ug Devin Booker nga nagkumboya'g 27 puntos.

Ang three-time NBA MVP nga si Nikola Jokic sa Denver Nuggers maoy nangu sa pilderong Serbia bitbit ang 20 puntos.