Petecio USA na lang ka daog gikan sa seguradong bronze

Si Nesthy Petecio mitikang ngadto sa usa na lang ka daog gikan sa garantisadong bronze medal sa Paris Olympics human iyang gibuntog ang pambato sa host France nga si Amina Zidani sa ilang sangka ubos sa women's boxing 57kg round of 16 kagahapon sa kaadlawon.

Upat ka mga judges ang mipabor sa 32-anyos nga si Petecio, samtang usa lamang amg midapig ni Zidani.

Human sa tentatibong sinugdanan diin klaro kaayong iyaha lamang gi-istudyohan ang lihok sa iyang kontra, si Petecio milusad og usa ka agresibong ataki a ikaduhang hugna diin siya mipatupa og solidong mga suntok ngadto ni Zidani.

Sa oras nga 1:44 sa ikaduhang hugna, ang garbo sa Santa Cruz, Davao del Sur nakalandig og makusog nga right hook sa nawong nga nakatumba ni Zadini.

Wala hinoon kini gideklara sa reperi nga usa ka knockdown hinungdan nga wala niini iphi si Zidani.

Sa pagpadayon sa aksiyon, ang mas paspas ug mas abtik nga si Petecio nagpunay og labay og kumo ngadto ni Zidani aron kontrolahon ang away sa hingpit hangtud sa katapusan.   

Sunod nga banggaon ni Petecio mao si Zichun Xu sa China sa alas 9:30 sa gabii karong adlawa (Dominggo, Agosto 4) diin ang modaog moabante sa semifinals ug segurado nang dunay mabitbit nga bronze.