Nest Workspaces 2013, FADI 2021, Puresteel 2011 4-0 na sa SHAABAA
CEBU, Philippines — Ang Nest Workspaces Batch 2013, FADI 2021, ug Puresteel Manufacturing Batch 2011 mikadlit sa ikaupat nilang sagunson nga daog sa Sacred Heart Ateneo Alumni Basketball Athletic Association (SHAABAA) Season 27 niadtong weekend didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.
Sa Division C, si JJ Ong miharos og 20 puntos ug 11 ka rebounds sa dihang ang defending champion Batch 2013 way kaluoy nga mikulata sa CSAS Batch 2024, 102-45.
Si Rendell Senining mihipos og 16 puntos, upat ka rebounds, ug tulo ka assists, si Emman Malazarte mitali og 12 puntos, upat ka rebounds, ug duha ka assists samtang si Fletcher Galvez mi-iskor og 11 puntos uban ang lima ka rebounds alang sa Batch 2013, nga nakakuha sab og 10 puntos matag usa gikan nilang Roland Go Bui ug Chino Chua.
Sa laing bahin, ang Batch 2021 nakaipsot sa Cebu Landmasters/CloudKart Batch 2014, 55-53, aron duyogan ang Batch 2013 sa kinatas-ang dapit sa liderato bitbit ang perpektong 4-0 nga mga baraha. Si Rey Marcus Fuentes IV ang bida sa Batch 2021 uban ang 11 puntos, lima ka rebounds, ug usa ka steal.
Sa Division C gihapon, si Lyder Kent Canieso nagmangtas sa dihang ang Xchange Forex Batch 2018 milampornas sa
Global Star Motors Batch 2020, 78-54, samtang si Philip Brandon Sainz mitagak og 22 puntos, 11 ka rebounds ug tulo ka assists alang sa GAB Airconditioning Batch 2023, nga mipayaka sa Bright Lamps N' Style Batch 2022, 77-67, alang sa una nilang daog.
Si Canieso miharos og 29 puntos, 15 ka rebounds, upat ka assists, duha ka steals ug usa ka block, samtang sila si Xavier Tariman ug Benedict Andre Chua nagkumboyag 25 puntos, 18 ka rebounds, upat ka assists, ug upat ka steals sa dihang ang Batch 2018 mitabla sa ilang rekord ngadto sa 2-2.
Sila si Kent Jason Dumandan, William Holan Baxter, ug Rove Danielle Galan nagkumbinar og 36 puntos sa dihang ang Batch 2023 mipakgang sa tulo ka sunod-sunod nilang malas.
Sa Division B, si Bernard Chioson mipupo og 28 puntos ug 13 ka rebounds sa dihang ang Batch 2011 milampornas sa Radius One Batch 2007, 74-51, aron pagpabiling way pilde sud sa upat ka duwa.
Miamot si Bradley Bacaltos og 15 puntos, siyam ka rebounds, duha ka assists, ug tulo ka steals, samtang si Franz Gabuya midonar og 12 puntos, duha ka rebounds ug tulo ka assists alang sa Batch 2011. Sa laing resulta, si Jan Galo mitali og 21 puntos, unom ka rebounds, ug duha ka assists aron ituboy ang Subtero Batch 2006 ngadto sa 73-58 nga paglampaso sa ZeroNine Batch 2009.
Si Mark Blanco mitimbre og 18 puntos, unom ka rebounds, ug upat ka assists, si Luis Yu adunay 12 puntos, lima ka rebounds ug lima ka assists, samtang si Dangen Gendrauli mikimada og 10 puntos ug 14 ka rebounds alang sa Batch 2006, nga nagkupot na karon og 2-2 nga marka.
- Latest
