Wolves mitagak sa Nuggets, mitikang sa NBA West finals

CEBU, Philippines — Ang Minnesota Timberwolves nagmilagro human malubong og 20 puntos aron tagakon ang defending champion Denver Nuggets, 98-90, sa Game 7 sa ilang NBA Western Conference semifinal series kagahapon didto sa Ball Arena sa Denver, Colorado.

Si Karl-Anthony Towns mikadlit og 23 puntos ug 12 ka rebounds aron pangulohan ang Wolves pagkab-ot og makapakurat nga kadaogan batok sa  inilog nga Nuggets.

Mihipos sab si Jaden McDaniels og 23 puntos samtang si Anthony Edwards mibubo og 12 sa iyang 16 puntos sa second half alang sa Wolves, nga nahimong labing unang team sa kasaysyaan sa NBA nga nakabawi human malubong og dili mominus sa 11 puntos sa halftime aron modaog sa usa ka Game 7.

Ang Nuggets mi-abante unta og 20 puntos sa sayong  bahin sa ikatulong kuwarter apan sa kalit lang mikagar ang ilang opensa ug kini nahitabo taliwala sa pagpanginit ni Edwards nga mipasikit sa Wolves ngadto sa usa na lang ka lugas padung sa pinal nga  12 minutos sa aksiyon.

Ang Wolves wala na molingi pa sukad ilang na-ilog ang labaw human sa layup ni Rudy Gobert sa nag-unang minute sa katapusang kuwarter.

Si Nikola Jokic mitali og 14 sa iyang 34 puntos sa katapusang kuwarter nga iyang gipalamanan og 19 ka rebounds ug pito ka assists. Si Jamal Murray mipabuto og 35 puntos apan ang Nuggets nakamugna og daghan kaayong mga sipyat nga maoy nag-unang hinungdan sa wala damha nilang pagkahagba.

"It's a special moment," matud pa ni Wolves head coach Chris Finch. "This is a hell of a team with the best player on the planet. The series was wild, and this game was just a microcosm of the series."

Ang Wolves makigharong sunod sa Dallas Mavericks sa best-of-seven West finals.