Nuggets gitiwasan ang Lakers, 3-0 na

CEBU, Philippines — Nagpadayon ang dominasyon sa Denver Nuggets ngadto sa karibal nilang Los Angeles Lakers human ila na sab kining gipayaka, 112-105, aron pagposte og 3-0 nga bintaha sa ilang NBA Western Conference first-round playoff series kagahapon didto sa Cryto.com Arena.

Si Aaron Gordon mipabuhagay og 29 puntos ug 15 ka rebounds samtang si Nikola Jokic midugang og 24 puntos, 15 ka rebounds ug siyam ka assists alang sa Nuggets nga nanginahanglan na lang og usa ka daog aron mo-abante sa ikaduhang hugna.

Mihimo sab og kasikas si Jamal Murray uban ang 22 puntos ug siyam ka assists ingon man si Michael Porter nga miharos og 20 puntos ug 10 ka rebounds alang sa Nuggets.

Ang dili maayong balita sa Lakers, wala pay team nga nakabangon human malubong og 3-0 sa usa ka best-of-seven playoff series sa kasaysayan sa NBA.

Si Anthony Davis maoy nangu sa Lakers uban ang 33 puntos ug 15 ka rebounds apan nalimitahan ngadto lamang sa tres puntos sa katapusang kuwarter. Si LeBron James mihipos og 26 puntos, unom ka rebounds, ug siyam ka assists sa pilderong kawsa.

Sa laing bahin, ang Philadelphia 76ers ug ang Orlando Magic parehong miresbak sa tagsa-tagsa nila ka mga kontra aron paglihay sa 0-3 nga kawot.

Si Joel Embiid mipabuto og 50 puntos aron pangulohan ang Sixers ngadto sa 125-114 nga pagpakaging sa New York Knicks.

Samtang si Paolo Banchero mipupo og 31 puntos ug 14 ka rebounds sa dihang gilampornas sa Orlando Magic ang Cleveland Cavaliers, 121-83.

Naglabaw pa hinoon gihapon sa serye ang Knicks ug ang Cavs sa baraha nga 2-1.