Madridejos Knights mopahigayon og torneyo sa mahinungdanong kawsa.

CEBU, Philippines — Ang Madridejos Knights Chess Club (MKCC) nga gipangulohan sa Texas, USA-based nilang playing team owner nga si Engr. Josito "Jojo" Clamor mopahigayon og usa ka torneyo alang sa mahinundanong kawsa karong adlawa (Dominggo, Mayo 5) pinaagi sa chess.com. Magsugod ang aksiyon sa alas 7:30 sa gabii.

Ang kita ning dalaygong kalihukan idonar ngadto ni Tony Cabibil, usa ka sakop sa MKCC nga dunay gihambin nga sakit sa iyang kidney ug padayon karong gi-atiman sa tambalanan. Ang entry fee nagkantidad lamang og P50 apan kadtong gusto mohatag og dugang tabang mahimong mopadala sa ilang rehistrasyon ngadto sa  Gcash account ni Cabibil (09519935249).

Si Arena FIDE Master Engr. Gilbert Anthony Ababat maoy mo-abaga sa rehistrasyon sa nag-unang 50 ka players nga magpa-miyembro sa Madridejos Knights. Aron mamahimong sakop sa MKCC, mahimong mo-log on sa https://www.chess.com/club/madridejos-knights-chess-club/join/6786d9

Bisan og usa ka fund-raiser, ang mga mananaog makadawat gihapon og ganting salapi.

Ang makampiyon mobulsa og P1,200, samtang ang mopahiluna sa ikaduha ngadto sa ikaupat nga dapit madkadawat og P600, P300, ug P200.

Gawas nilang Dondon ug Ababat, misuporta sab sila Grandmaster Enrico Sevillano, Woman National Master Susan Itaas, ug Ismael Castillo Jose ning kompetisyon alang sa maanindot nga katuyoan. Sila Dondon, nga usa ka US Candidate Master ug Arena International Master, Ababat, ug Cabibil mga sakop sa Madridejos Knights nga anaa karon sa finals sa Association of Chess Amateurs of the Philippines, Inc. (ACAPI) 1st President’s Cup. Si Joseleo Cortes ang lain nilang teammate.