Mavs mi-abante, magic buhi pa

CEBU, Philippines — Si Luka Doncic mikadlit og 28 puntos ug mipasa og 13 ka assists samtang si Kyrie Irving mitali og 28 sa iyang  30 puntos sa second half sa dihang ang Dallas Mavericks mi-abante sa ikaduhang hugna sa NBA playoffs human gipalukapa sa hingpit ang Los Angeles Clippers pinaagi sa 114-101 nga desisyon sa Game 6 kagahapong adlawa didto sa American Airlines Arena sa Dallas, Texas.

Bisan og dunay gipamati sa tuo niyang tuhod, si Doncic mihimo og impresyon aron kab-oton ang wala nya mahimo tulo ka tuig na ang milabay - ang pagpalagpot sa Clippers didto sa Dallas sa Game 6 sa first-round series.

Sa pagtuldok nila sa serye sa baraha nga 4-2, nadoble ang kalipay ni Doncic kay ang Mavericks mibuntog na gyud sa Clippers sa unang higayon sa miagi nilang tulo ka panag-abot sa unang hugna sa playoffs sud sa lima ka seasons.

Tungod niini , Mavs mitikang sa Western Conference semifinals diin ilang sangkaon ng top seed  Oklahoma City Thunder sugod karong Miyerkules.

Si Paul George mipupo og 18 puntos ug 11 ka rebounds alang sa Clippers.

Ang lain nilang pambato nga si James Harden mihipos og 16 puntos ug 13 ka assists apan mipasud lamang og lima sa 16 niya ka itsa ug nangitlog  sa unom ka gibuhian niyang tres. Sa laing duwa,  ang Orlando Magic nakasugakod sa  gipabuhagay nga  50 puntos ni Donovan Mitchell aron pakagingon ng Cleveland Cavaliers, 103-96, ug pagpuwersa og tinagakay nga Game 7 sa ilang Eastern Conference playoff series.

Si Paolo Banchero mibubo og 10 sa iyang 27 puntos sa katapusang kuwarter apil na ang krusyal nga 3-pointer nga nakapalabaw sa Magic sa hingpit sa pinal nga 3:39 sa duwa.

Dako sab og natampo si Franz Wagner nga miharos og 26 puntos ingon man si Jalen Suggs nga milansang og unom ka tres sa iyang  22 puntos alang sa Magic.

Bukid pa hinoon gihapon ang tungason sa Magic gumikan kay ang Cavs man maoy mo-host sa Game 7 karong Lunes.