Gerry Peñalosa saludo sa ALA

CEBU, Philippines — Ubos sa paggiya sa founder niining si Antonio 'Bidoy' Lopez Aldeguer, nag-unang misyon sa ALA Gym mao ang paghatag sa mga boksidor niini og lig-ong pundasyon nga maoy katukoran nila sa ilang kinabuhi.

Gipaneguro sa nabaniog nga stable sa Sugbo nga ang ilang mga boksidor armado og saktong pamatasan nga makahulma kaniya dili lamang mga kampiyon, apan hasta sab tinamod nga mga indibidwal.

Si Gerry Peñalosa usa niadtong mga na-impluwensiyahan sa prinsipyo sa ALA nga nakatabang kaniya sa saktong dalan sa kinabuhi.

"Si sir ALA nakatabang og dako kaayo dili lamang sa akong boxing career, apan hasta sab sa tibuok nakong pagkatawo," matud pa ni Peñalosa nga usa sa mga sakop sa orihinal nga ALA Boys uban nilang Edito Villamor, Andy Tabanas, Peter Cuizon, Rey Cosep ug uban nga nangharos sa eksena sa Philippine boxing niadtong tunga-tungang bahin sa dekada '80s.

Sukad siya nahimong pro niadtong 1989, si Peñalosa mikulit og malampusong karera nga milanat og kapin sa duha ka dekada ug naghatag kaniya og duha ka world titles sa managlahing weight division.

Karon nga usa na ka notadong magpapatigayon ug establisadong promoter, ang 49-anyos nga si Peñalosa nagkanayon nga nabuak ang iyang dughan human masayod nga ang ALA Gym nanirado human sa 35 ka mabulukon nga tuig.

"Siyempre sad kaayo ko nga nag-close ang ALA Gym kay daghan pa unta sila matabangan og mga pobre ug mga aspiring boxers," sumala ni Peñalosa.

Apan buot na lamang hinumduman ni Peñalosa ang mga maanindot niyang mga tuig uban sa ALA Gym nga napuno og mga handumanan nga dili niya mahikalimtan sa tibuok niyang kinabuhi.

"With ALA's support, na-champion ko at the same time naka-graduate ko og BSMC (Bachelor of Science Major in Criminology) sa University of Cebu. ALA always looks for your future. I always remember ALA's question nako , "what you gonna do after boxing?". Kung unsa man ako naabot karon, I owe it to ALA.Salute!".