Crawford daog batok Khan sa kontrobersyal nga sangka
CEBU, Philippines — Gipakita ni Terence “Bud” Crawford nganong siya karon maoy giyukboan nga 'pound-for-pound king' sa kalibutan sa boksing human iyang gibuntog si Amir Khan pinaagi sa kontrobersiyal nga 6th round TKO kagahapon didto sa Madison Square Garden sa New York.
Gawas nga miinat sa way pilde niyang record ngadto sa 35-0 nga gidayan-dayanan na karon og 26KOs, si Crawford milampos sab pagdepensa sa iyang WBO welterweight title sa ikaduhang higayon.
Nakontrobersiyal hinoon ang resulta human si Crawford aksidenteng nakalandig og 'low blow' ug dayon maoy gideklara nga mananaog sa dihang si Khan mipadayag nga dili na siya makatiwas pa sa away.
Wa mahimuot niini ang kapin sa 14,000 ka mga fans nga nagdungan og suliyaw human giundang ni reperi David Fields ang away sa nahibiling 47 segundos sa ikaunom nga hugna.
"The coach stopped the fight," matud pa ni Fields agig pasabot nga iyang giundang ang away human misenyas kaniya ang trainer ni Khan nga si Virgil Hunter nga dili na makapadayon pa og sinukmagay ang iyang bksidor batok ni Crawford.
Bisan og nahuman pa ang away, tataw nga way padaog si Khan batok sa bangis nga si Crawford.
Gani sa unang hugna pa lamang, hapit ma-knockout ni Crawford si Khan nga iyang gipatikangkang gamit ang overhang right ug dayon hait nga left hook.
“The fight I want next is Errol Spence,” dason pa Crawford kabahin sa kon kinsay gusto niyang sunod banggaon.“Whenever he is ready he can come and get it.”
Sa iyang bahin, mapaubsanon nga gidawat ni Khan ang mapait niyang kapildihan sa mga kamot sa labing maayong boksidor karon sa kalibutan.
“I now know why Terence is one of the best pound-for-pound fighters in the world,” angkon pa ni Khan nga natagak ngadto sa 33-5 uban ang 20KOs.
- Latest
