Aron awayon si Marquez sa Manila Pacquiao mibungat P3 billion sa DoT
CEBU, Philippines - Gusto ni Manny Pacquiao nga sangkaon sa ikalimang higayon ang Mehikano niyang karibal nga si Juan Manuel Marquez dinhi sa Pilipinas.
Aron mahitabo kini, si Pacquiao nagkanayon nga kinahanglan siya og P2.5 billion ngadto sa P3.5 billion.
Mao kini ang hinungdan nganong nangayo siya ni Tourism Secretary Wanda Corazon Teo sa maong kantidad nga gamiton aron pagpadagan sa away dinhi sa nasud.
“Approximately sabi ko sa kanya nasa 3 o 2.5 billion. Kasi plano ko mag-rematch kay Marquez tapos dito ko dalhin si Marquez sa Pilipinas,” matud pa ni Pacquiao ngadto nilang Boyet Sison ug kanhi senador Freddie Webb sa programa nilang Fastbreak nga mabati sa DZMM.
Tataw kaayong si Pacquiao gusto pang makigbinukbukay ni Marquez nga mao ang dunay katapusang katawa sa dumot nilang panagkaribal sa dihang gipakatug niini ang Pinoy ring star sa ikaunom nga hugna sa ikaupat nilang bugno niadtong 2012.
Sa pagka karon, si Pacquiao gikatakda nga moaway batok ni Jeff Horn karong Abril 23 sa wala pa hisayring binyu, apan ning sayo pa iyang gipadayag ang iyang interes kang Marquez.
“Maganda kasi ‘pag kami naglaban, hindi takbu-takbuhan,” dugang pa ni Pacquiao.
Sa iyang bahin, si Teo mipadayag nga dili imposible nga ilang makuha ang maong kantidad ilabi na kun bug-at nga pangan ang sangkaon ni Pacquiao.
“Kinausap nga ako ni Manny Pacquiao, we talked and he said, humingi siya ng P3 billion for the fight,” dason pa ni Teo. “I was telling him, 'pag (Floyd) Mayweather o si Marquez, madali 'yung i-sell, kaya namin ang P3 billion.” (BANAT NEWS)
- Latest
