Boracay Rum kampiyon sa Bayugan caging

CEBU, Philippines - Gipilde sa PBA D-League contender Boracay Rum ni coach Lawrence Chongson ang ilang karibal SG Merchandise, 77-70 aron sakmiton ang titulo sa 2014 Bayugan City Mayor's Cup Invitational Basketball Tournament niadtong Domingo didto sa Lope  Asis Memorial Gymnasium sa  Bayugan, Agusan del Sur.

Ang Boracay Rum gipangulohan ni Royder Cabrera, kinsa mikadlit og 18 puntos, gisundan nilang Mon Iligan ug Jaypee Belencion nga adunay 11 puntos matag usa.

Ang Sugbuanon ug kanhi PBA cager nga si Stephen Padilla mitusak sab  og 18  puntos alang sa napildeng SG Merchandise nga miparada sab og  PBA players nga silang Eliud Poligrates ug Jayford Rodriguez.

Sa duwa alang sa ikatulong puwesto, ang team Joannie ni coach Van Halen Parmis midaog batok sa reigning CESAFI champions University of the  Visayas (UV) Green Lancers, 81-74.

Si Bayugan mayor Kim Lope A. Asis ug iyang kapikas nga si Aida maoy nangunay  paghatag sa mga premyo ngadto sa mga mananaog ning maong torneyo nga gipaluyohan ni Garvey Dy, ang brand associate sa Omega Pain Killer, Jimberns Builders and Construction Supply, Madyaw Construction ug Panalay Tailoring.

Ang Boracay Rum mibulsa'g P250,000 bugti sa ilang kadaugan, samtang ang SG Merchandise nakadawat og P150,000. Ang team Joannie  nakaangkon og P100,000, samtang ang UV Lancers miuli bitbit ang P75,000 nga ganting salapi. (BANAT PALARO)