Boozer nikulit sa iyang pangalan sa NBA

CEBU, Philippines — Nikulit sa pangalan ang 19 anyos nga rookie sa Memphis Grizzlies nga si Cameron Boozer human siya nahimong ikaduha sa pinakabata nga magduduwa sa kasaysayan sa NBA nga nakatala og "triple-double" niadtong Huwebes sa gabii.

Kini human sa iyang napupo nga 18 ka puntos, 12 ka rebounds, ug 12 ka assists atol sa ilang kadaugan batok sa Portland Trail Blazers, 124-103,  sa mismong homecourt sa ilang kontra.

Si Boozer mao ang third pick sa 2026 NBA Draft — ug mao karon ang pinakabata nga magduduwa sa liga.

Ang bugtong magduduwa nga mas bata pa kang Boozer nga nakahimo og triple-double sa kasaysayan sa NBA mao si Josh Giddey, sa Oklahoma City Thunder  nga nag-edad palang og 19 anyos niadtong Enero 2, 2022 sa dihang nakatala  kini og 17 ka puntos, 13 ka rebounds, ug 14 ka assists sa ilang kadaugan batok sa Dallas Mavericks.

Ang 6-foot-8 nga 250 pounds nga si Boozer nakatabang og dako sa Grizzlies aron makuha ang ilang ikaduhang 5-0 standing sa pagsugod sa kasaysayan sa prangkisa (ang una niadtong 2014-15).

Gawas sa maong bag-ong record, si Boozer pud ang pinakabatang frontcourt player nga gihuptan kaniadto sa sentro sa San Antonio Spurs nga si Victor Wembanyama, kinsa 20 anyos ug unom ka adlaw palang niadtong Enero 10, 2024, dihang nakatala siya og 16 ka puntos, 12 ka rebounds, ug 10 ka assists batok sa Detroit Pistons diin sila ang nakadaog.

Kaning triple-double ni Boozer nahitabo ni sa iyang ikalima pa lang niya nga duwa sa NBA.

Sa kasaysayan sa NBA, ang uban mga magduduwa nga nakahimo niini sulod sa lima palang mga duwa mao ang Hall of Famer nga si Oscar Robertson (1960, sa Cincinnati Royals), ang kanhi NBA champion nga si Art Williams (1967, sa San Diego Rockets), ug si Ben Simmons (2017, sa Philadelphia 76ers).

Ang duwa niadtong Huwebes (Biyernes dinhi sa ato) naglambigit sa duha sa katapusang tulo ka mga koponan sa NBA nga wala pa mapildi.

 Ang Houston Rockets na lang ang laing koponan sa liga nga nagpabilin nga wala pa mapildi.

Mobalik sa aksyon sila si Boozer ug ang Grizzlies karong Sabado sa gabii ug makaatubang ang wala pay daog nga Sacramento Kings , 0-5.— IBM