L.A. Clippers misakmit sa Pacific Division title

CEBU, Philippines -  Nasakmit sa Los Angeles Clippers ang  Pacific Division  title   dihang ilang gilubong ang Los Angeles Lakers, 109-95 kagahapon didto sa Staples Center sa Los Angeles, California.

 Gipangulohan ang kadaugan nilang  Chris Paul ug Blake Griffin  nga miiskor og  24 puntos matag usa.  Gawas sa ilang mga puntos, si Paul mihimo sab og 12 ka assists, samtang si Griffin milangkat og 12 ka rebounds alang sa Clippers, kinsa miharos sa ilang season-match batok sa Lakers, 4-0.

 Ang 1974-1975 nga team  nga giila pa nga Buffalo Braves, maoy laing franchise nga nakaharos sa Lakers.

 Sa una nilang sangka,  ang Clippers midaog sa iskor nga 105-95, nausban  kini  107-102 sa ikaduha nilang panag-abot. Ang labing daku nilang labaw sa iskor nga 125-101  sa ikatulo   nilang panagsangka ug kagahapon  sa iskor nga 109-95.

 Si  Jamal Crawford  miamot og 20 puntos, si Caron Butler miabuno og 14 puntos.

 Isip division winner, ang Clippers segurado na nga maoy maghupot sa ikaupat nga puwesto.

 Si  Kobe Bryant maoy nangu sa Lakers sa iyang 25 puntos, 10 ka assists ug pito ka rebounds. Si  Dwight Howard mitampo og 25 puntos, samtang si Pau Gasol  midugang og 12 puntos uban sa 13 ka rebounds.

 Wala gihapon makaduwa alang sa Lakers silang Steve Nash ug Metta World Peace.

 Tungod sa kapildihan, ang Utah Jazz  mao karon ang temporaryong nahimutang sa ikawalong puwesto sa Western Conference sa ilang 41-37 win-loss record, samtang ang Lakers naanod ngadto sa ikasiyam uban ang 40-37 nga baraha.

 Ang Jazz mipilde sa Golden State Warriors sa iskor nga 97-90.