EDITORYAL - Apektado ang tanan

Kaning tension sa Middle East nakapakulba sa daghang mga tawo, bisan og layo ang Pilipinas didto dako kaayo kini og epekto sa mga Pilipino. Ang Iran ug Israel parehong nagbinayloay og pagpamomba sa usa’g-usa, ug niapil pa gyud ang Amerika.

Ang tinubagay sa Israel ug Iran, nag-ugat pa kini sugod pa niadtong 1979  human nga gipalagpot ang mga Shah ug gipulihan sa radical nga Shiite Islamic leader nga si Ayatollah Ruhollah Khomeini.

Sukwahi sa Shah nga kasinabot ug katimbang pa gani sa Israel, walay laing mogawas sa baba ni Khomeini kondili ang pagbungkag sa Israel ug sa Amerika. Ubos sa iyang liderato gikan 1979 hangtud 1989, gipaluyohan nila ang mga nagkalain-laing terrorist groups sama sa Hamas, Hezbollah, People’s Liberation Army ug uban pa.

Ang nipuli kaniya nga si  Ayatollah Ali Khamene gikan 1989 hangtud karon mao gihapon ang dagan sa huna-huna, ang buntogon ang Israel ug Amerika ug gibutang sa peligro ang tibuok rehiyon.

Mao nga bisan unsa kagamay nga paglaum aron mahunong ug dili na modako pa ang kagubot, dako kaayo kining kalamboan tungod kay nagagikan sa maong rehiyon ang halos tanang petrolyo ug daghan ang maapektahan.

Dili lamang ang supply sa petrolyo ang maapektohan, kondili hasta pud ang mga negosyo sa mga kanasuran sa maong rehiyon ilabi na sa Persian Gulf sama sa Bahrain, Qatar, UAE, Kuwait, Oman, Saudi Arabia, Israel, Jordan, Yemen, Lebanon ug Iraq.

Mga lugar kini nga dunay mga langyaw nga mga nanarbaho, apil na ang Pilipinas nga dunay daghang OFWs nga naa didto karon.

Ang kagubot didto ang rason nganong gipahunong ang deployment sa mga OFWs didto ug gimandoan ang mga naa sa Israel ug Iran nga mopauli balik sa Pilipinas.

Pila ka libong pamilya ang maapektahan mamauli sila ug kadtong lumargahay dili makalarga tungod sa kagubot? Kaning report nga dunay ceasefire dili pa kini mao, tungod kay kinahanglang aktwal kining tahuron sa Iran ug sa Israel nga parehong diskumpiyado sa usa’g-usa.