Sabong panglaba batok sunog

Kinsay magdahum nga ang powdered detergent nga atong gagamiton sa pagpanglaba sa atong bulingon nga bisti dako og ikatabang sa pagkumbati sa sunog.

Kini ang gitudlo mismo sa pangulo sa Cebu City Disaster Risk Reduction and Management Office Retired Col. Aderson Comar kinsa nagserbisyo kaniadto isip fire marshall sa BFP Cebu Province.

Gipakita niya kini sa mga barangay fire responders sa kabukiran nga lisod ug dugay abton sa mga fire trucks busa gikinahanglan ang mga pamaagi nga sama niini aron makahimo og dinalian nga pagresponde sa sunog.

Unsaon man kini? Ang mga empty o wala nay sulod nga tangke sa fire extinguisher inay ilabay, gi-improvised kini nila, gamit ang powdered detergent nga gisulod sa tangle ug gibutangan og tubig ug hangin isip pressure. Gibutangan og kanyoto aron mapahinganan ug mahimo na gamiton pangpatay sa sunog.

Kong magpa-refill pa dako ang gasto ug layo sa sad kaayo.

G-idemonstrate nila dihang gigamit sa pagpawong sa dinagkotan nga mga dahong laya ug kahoy sa kabukiran,  ug epektibo ang pagpawong niini.

Dako og matabang sa mga tawong nagpuyo sa bukid nga makahimo sa pagtubag sa alarma kong adunay motumaw nga sunog.

Laing gipakita sa CCDRRMO ang pamaagi sa pagkombate sa sunog sa kasagbotan ug kakakahoyan nga motumaw kada tuig sa kabukiran mao ang manomano nga pagpawong sa kayo nga walay dala nga fire truck ug labaw na nga walay tubig.

Gamit ang mga chainsaw ug ubang pagpangputol sa kahoy, ang mga dahon sa pinutol nga sanga sa kahoy ang gigamit nila sa paglambos sa kalayo ug gipangkahig nila sa rake ang mga dahon nga nagsilaob. Malamposon sila sa ilang gihimo.

Pipila lang kini sa pamaagi nga gitudlo sa mga eksperto ngadto sa mga barangay fire fighters atol sa tulo ka adlaw nilang pagbansaybansay sa Buhisan ug nakakat-on usab ang mga gipangtudloan.

Maayo unta kong dili lang kutob sa training ug magamit nila ang nakamahoan sa tinuod nga panghitabo.

Ang programa inisyatiba sa LGU pinaagi ni Ramil Ayuman, ang chairman sa Cebu City Disaster Risk Reduction and Management Council, diin gitinguha nila ang zero fire sa kasagbotan ug kakahoyan sulod niining panahon sa ting-init ug makab-ot lamang kini pinaagi sa hugot nga pakig alayon sa mga hingtungdan.

Unta dili magamit sa mga fire responders ang ilang katakos kay wala namay sunog nga mahitabo.

Matngon lang gyud aron malikay sa sunog ilabi na nga nisamot ang kainit sa panahon.