Obligasyon sa kapolisan

Sa usa ka demokratikong nasud sama sa Pilipinas, dako ug mahinungdanon ang papel nga gigunitan sa mga sakop sa medya paghatud og balita og mga importante nga impormasyon ngadto sa matag panimalay.

Alang kanamong mga lehitimong mamahayag, usa kini ka honorable nga bokasyon tungod lagi sa kamahinungdanong papel nga among gihuptan isip mga mensahero sa katawhan.

Taliwala sa risgo sa trabaho, dako namong garbo ang pagserbisyo sa katawhan. Apan subong palandungon nga usahay adunay pagduda sa pipila nga usahay maagrabiyado sa among trabaho.

Sama pananglit sa hulga sa Cebu City Police Office nga wala mahimuot sa post sa Facebook sa The Freeman sa among pag-monitor sa sitwasyon sa mga tulonghaan niadtong unang adlaw sa pag-abli sa klase.

Sa online post sa The Freeman, walay usa ka sakop sa kapolisan ang nakit-an sa among reporter sa iyang pag-adto sa City Central School usa ka higayon niadtong niaging Lunas, ang unang adlaw sa klase.

Matud sa CCPO, fake news kadtong maong post sa The Freeman tungod kay naa kunoy mga pulis nga nadestino sa maong tulonghaan niadtong mga panahona. Gani mihulga pa ang kapolisan og legal nga aksiyon batok sa among reporter.

Apan dili gyud matuis ang online post sa The Freeman diin ang mga hulagway nagpakita nga wala g'yuy ni usa ka pulis ang anaa sa City Central School pag-monitor sa among reporter niadtong tungora.

Ambot unsay nakaon sa kapolisan nga pwerte man nila nga nakarebenta sa maong post. Kong naatlan sa among reporter nga walay usa ka pulis ang tua sa maong tunghaan, dili namo obligado ang pag-esplikar ngadto sa publiko.

Obligasyon kana sa kapolisan.