Buhing patay

Usa ka 73-anyos nga empleyado sa Metropolitan Manila Development Authority (MMDA) nga si Romeo Bilbar ang nasaypan nga patay na segun sa record sa PhilHealth nga naghimo kaniya nga dili na eligible sa mga benepisyo sa maong ahensiya.  Ang tanan mamatay man apan dili usab maayo kon i-deklarar na nga patay ang usa ka tawo samtang buhi pa siya.  Makapahinumdum sa apo nga nanghambog sa pag-ingon nga, “Malinawon ra gyud nga namatay ang akong apohan samtang siya nahinanok pagkatulog.  Dili sama sa iyang mga pasahero nga nagsiyagit sa kahadlok sa wala pa mahagbong sa bung-aw ang bus nga iyang gimaneho.”  Pagkatoytoy!

Wala kaabot sa chorus

Gilusad sa COMELEC ang Kontra Bigay 2.0, usa ka inisyatibo sa ahensya nga gitumong sa pagsanta sa vote-buying ug vote selling panahon sa eleksyon.  Layo ra sa tinuod kining inisyatibo sa COMELEC kay ang gobiyerno man mismo maoy numero uno’ng nagsupak sa maong lagda, pinagi sa na-institutionalize na nga mga ayuda sama sa 4Ps, AKAP, TUPAD ug uban pa.  Nahisama kining lagda sa COMELEC sa yabag nga contestant sa singing contest nga “Wala pa gani makaabot sa chorus, gibagtingan na sa mga hurado.”  Fezteleern!

 Ayuhon ang dili guba?

Gikwestiyon sa ubang miyembro sa konseho sa dakbayan sa Sugbo ang gilaraw nga lain na usab nga renovation sa Cebu City Sports Center (CCSC) nga mokantidad og P64 milyones.  Mahadugang ang maong kantidad sa dul-an P65 millyones nga nagasto sa miaging tuig sa pag-repair gihapon sa maong pasilidad.  Mora man og nahaum kining kahimtanga sa pagya nga, “Polisiya sa gobyerno nga kon dili guba, ayohon hangtud nga kini maguba.”  Dako ang posibilidad nga madayon ra gihapon ang maong proyekto.  Nianang higayona, angayan butangan og karatula sa ganghaan sa CCSC nga nagkanayon, “Government Project On-going; Please apologize.”  Madahaan!

 Himaya’ng nahunlak

Gisalindot ni Bise Presidente Sara Duterte ang pagtoo nga aduna siya’y kahimangod ni’ng pagbotar sa mga kongresista gikan sa Mindanao pabor sa iyang impeachment.  Matud pa niya, wala siya’y personal nga relasyon tali kanila ug wala usab siya’y barkada nga politiko.  Maingon diya nato nga “wala’y himaya nga nahugno ug nahunlak ni’ng pagbiya sa mga kongresista sa bise presidente.”  Hinonoa, makaingon ang mga dumadapig ni Sara nga “Patay na relasyon nga kanhi puno sa himaya; patay na’ng pagbati’ng nalumsan sa mga luha.”  Atala lagee!

“Naay itlog ang special”

Namahayag ang retirado nga Supreme Senior Associate Justice nga si Antonio Carpio nga dili makapatawag ang presidente og special session sa Senado alang sa impeachment trial sa bise presidente tungod kay ang pagpatawag og special session alang lang sa pag-umol og balaod.  Nasayran usab nga walay kasibot mopatawag ang Senate president og session human modeklarar ang Senado og adjournment, regular man o special.  Makapahinumdum sa akong kasinatian nga sa dihang gipangutana nako ang tindera kon unsay kalainan sa special ug sa regular nga batchoy, yano akong gitubag nga, “Naay itlog ang special, Sir.”  Ateerr!