Dili sayon ang pagdaog

Upat ka iladong kandidato ang pagtigi kon kinsa kanila ang modaug pagka mayor dinhi sa Cebu City.

Ang managan pagka mayor mao si suspended Cebu City Mayor Michael Rama, Cebu City acting Mayor Raymond Alvin Garcia, kanhi PDEA regional director Yogi Ruiz, ug si Cebu City Councilor Nestor Archival.

Si Atty. Joey Daluz nga kanhi nagpahibawo nga modagan pagka mayor, akong nahibaw-an nga mag-bise na lang ni Acting Mayor Garcia.

Dili sayon ang pagpangampanya aron masiguro nga makadaog ka pag-apil sa eleksyon. Kay kon sayon pa lang, miapil na ko kay gusto man gyud unta ko nga makatabang paghimo og kausaban.

Apan ang pag-apil nimo sa eleksiyon magkinahanglan man gyud nga mogasto ka kay unsaon man nimo pagpahigayon og mga pulong-pulong kon di ka mogasto.

Kinahanglan ka nga dunay mga sound system nga magamit sa pagpahigayon og pulong-pulong, mga sakyanan ug uban pa nga mga gastohan.

Sayonan ka nga kon ari ka sa Cebu City modagan pagka mayor, 80 ka barangay ang kinahanglan nimo nga adtoon, ug dili mahimo nga moderitso ka lang pag-adto didto.

Sa ato pa, duna ka gyuy mga tawo nga tahasan sa mga gimbuhaton pagkontak kon asa dapit ang angay’ng himoan sa tigum, ug ang pag-awhag sa katawhan nga mamati sila nimo.  

Apan nakabantay ko nga duna gyuy mga tawo nga wa maghunahuna niining mao nga problema. Ang ila nga gihunahuna basta kay maka-file lang sila og Certificate of Candidacy.

Mao na nga kon pananglit senador ang imong daganan, sutaon sa Comelec kon makagasto ka ba sa pagpahigayon og nationwide campaign. Kon dili gani ka makahimo, ideklarar ka nga nuisance candidate ug tangtangon ka sa voter’s lists.

Bisan dinhi sa Cebu City ug sa probinsya sa Sugbo, pananglit mo-file ka pagka mayor, gobernador, konsehal pero di ka gani makapangampanya, nagsamok-samok ka lang sa balota.

Dunay mga tawo nga ingon niini og batasan. Usa nako ka amigo nga ilado kaayong broadcaster, giingnan nako nga kon molansar siya pagka konsehal sa siyudad, modaog gyud siya.

Abi ninyo og unsay iyang gitubag kaniadto? Matud niya “Dili ta kasiguro uy, dunay uban nga di mobotar nimo kon wa kay kwarta.”

Sa May 12, sunod tuig, mga 68 milyones ka botante ang gipaabot nga mobotar sa midterm elections.

Kapin sa 18,000 ka pwesto ang ilogan sa mga nangandoy nga mapili sa katungdanan. Ang ilang daganan mao ang 12 ka pwesto sa pagka senador, 254 ka kongresista, ug 63 party-list representatives.

Unya 17,942 gob ernador, bise gobernador, Provincial Board members, mga mayor, bise mayor ug mga konsehal sa mga siyudad ug lungsod.