EDITORYAL - Kinsay mabasol aning basura?

Matag mobunok ang uwan unya mosaka ang tubig baha sa kadalanan kay niawas ang mga kanal ug ang mga sapa, ang basura nga nakabara maoy sagad hinungdan.

Kun basura na maoy hisgutan, pirme dayong basulon ang katawhan nga maoy pataka og labay og basura bisan asa nga maanod padung sa mga kanal hangtud sa mga sapa. Apan duna bay nangutana o nibasol sa mga kolektor sa basura? Pirmeng ang basulon ang mga tawo kay lagi kuwang kuno og disiplina. Tinuod man kini tungod kay daghan man gyung mga tawo nga padayung lisod disiplinahon.

Gani sa mga barangay makita man ug nakaila gyud ang mga managsilingan kun si kinsa sa ilang lugar ang mga hugawan ug dili tighipos o magtarong og hipos og basura.

Apan daan naman ni nga problema nga hangtud karon wala pa gihapon hingpit nasulbad kay gahi lagi og ulo ang ubang mga tawo.

Ang kuwang lang gyud ani mao ang hugot gyud nga implimentasyon sa mga ordinansa batok aning pataka og labay og basura o dili manglimpyo sa ilang mga tugkaran.

Angay sab basulon kining mga barangay officials nga gitahasan sa koleksyon sa basura, kay usahay naa nila ang sayop.

Naa silay gipamutang nga eskedyul kunohay o oras sa paghakot sa basura, apan pwerteng dugayang maabot sa trak ug dili na makapaabot ang mga tawo.

Resulta, ang mga basura ipamilin lang sa kilid sa karsada sa mga designated collection point, apan usahay dili man gyud makolekta sa mga trak kay naaberya, way drayber, guba ang makina ug uban pa.

Ang mga gitapok nga basura, aw nag-awas awas na ug pamungkagon sa mga iro ug magkatag-katag na hinuon. Usahay , maabtan sa pagbunok sa uwan ug anuron padung sa mga kanal hinungdan sa pagbara.

Kani pung mga tawo sa duol aning mga gitambakan og basura, dili sab magpakabana bisan nalang magtinabangay nga dili magpasad ang basurang nangatanggong diha sa ilang palibot, kay mas daghan ang ilang bagulbol kay wala naabot ang trak nga mokolekta.

Kaning problema sa basura, ang tanan angay mabasol. Kinahanglan magpakabana ang mga tawo ug kinahanglan sab di magpabaya ang barangay ug ang siyudad aron sigurong mahakot gyud sa oras ang mga basura.