Nanggamit gipanitan sa nagamit

Sa usa ka press conference, gibutyag ni Bise-Presidente Sara ‘Inday’ Z. Duterte nga niadtong naghinangat pa lang ang 2022 election, puwerte nang hangyo sa magsuong Senador Imee Marcos ug Bongbong Marcos Jr. nga makig-tandem siya ni Bongbong. Si Inday maoy mokandidato pagka-presidente samtang si Bongbong ang mag-bise.

Sa sinugdanan, si Inday mibalibad. Kay kontento na kon makatulo ka termino sa iyang pagka-mayor sa Davao City. Busa miklarong dili siya interesado nga mag-presidente. Apan gibalikbalikan siya pagbisita sa magsuong Marcos, kinsa misaad nga ipadayon ang tanang maayong proyekto nga nahimo ug nasugdan na ni kanhi Presidente Rodrigo Roa Duterte ingkasog ang ilang BBM-SARA tandem maoy modaog.

Sanglit, kinaiya man sa mga Duterte ang pagkamatinud-anon-tinarong pagpangalagad sa katawhan ug serbisyong makapalambo sa atong nasud, diin gusto sab si Inday nga mapadayon niya ang exemplary performance sa iyang amahan, aw, napatando siya sa magsuong Imee ug Bongbong. Unya, mihatag pag pabor si Inday. Si Bongbong maoy gipakandidato pagka-presidnete samtang si Inday, nag-bise na lang.

Apan naunsa bang pagkadaog nilang duha, sa pagsugod pa lang, nakatimaho na man si Inday nga may plano ang dali rang nahulmang Marcos-Araneta-Romualdez forces nga ipa-impeach siya ug gukdon ang pamilyang Duterte sa administrasiyong Marcos?

Hinungdan, nahimugso gikan sa gisakitang kasingkasing ni Inday ang paghingalan ni House speaker Martin Romualdez og ‘Tambaloslos’ ug ‘mga manggagamit’ ngadto nila ni Bongbong, Imee ug Liza Araneta-Marcos, kinsa matud pa ni Atty. Glen Chong, nga suheto-saksi sa dautang taras sa Unang Pamilya, nga maayo lang kuno kon ikaw magamit pa nila. Pero kon dili na, hugawhugawan-lud-an ka ug idan-ok ka na lang nila sa basurahan.

Sukad, midistansiya si Inday sa mga Marcos, diin siya mipasalig nga mao nay magsilbeng Tingog sa Katawhan, namatikdan: Nga Si Inday isog na kaayong mipanit sa pagkatawo niining mga politiko, ma-Marcos man, o Risa Hontiveros, kinsa maayo lamang mogamit, unya dihang nakagamit na, dili gani kaantigong mopasalamat ug moilag maayong kabubut-on sa nagamit? Haskang daghanang nakakomentariyog: “Mirisi!”

Niining pagpanit ni Inday kanila, nawalis ang maskarang nakatakip sa ilang gitagong orihinal nga hitsura. Ug inanay’ng nakita ang unsa gayoy tinuod?  Gikalipay kini sa mga nagmahal sa kamatuoran, kinsa madasigong miabiba: “Go, Inday!”