Kahapdos sa sumbalik
Bisan unsay isulti sa kampo ni kanhi Presidente Rodrigo Duterte mosumbalik nila:
· Dihang nitiyabaw si Bise Presidente Sara Duterte Carpio nga politikanhong pagpanghasi ang paglambigit sa ilang pamilya sa drug smuggling, gipahinumdoman siya nga mas daghan ug mas dagkong mga kasong kriminal ang gipasaka sa administrasyon sa iyang amahan batok ni kanhi Bise Presidente Leni Robredo; ug
· Dihang gitawag ni Senador Bato dela Rosa nga mga oportunista ang mga kongresista nga nanaway sa laktod nga pinatyanay sa drug war, gisupalpal siya ni Kongresista Romeo Acop nga itoy sa mga Duterte.
* * *
Tinuod nga makalilisang nga mga kaso ang gipasaka sa prosecutors sa administrasyong Duterte batok ni Robredo niadtong Hulyo 2019: Sedition, inciting to sedition, cyber-libel, libel, estafa, harboring a criminal ug obstruction of justice.
Pero lahi ni Carpio, wala mag-drama si Robredo. Bisan mas klaro, mas bangis, mas malisyuso ug mas bastos ang mga pagpanghasi nga iyang nahiagoman gikan sa kanhi presidente. Gi-atubang niya ang mga pasangil batok niya, gitubag niya ang tanang mga ebidensiya nga gipresentar sa gobyerno ug nakumbinser niya ang korte sa pagbasura sa tanang mga kaso.
* * *
Samtang sakto si dela Rosa nga kasagaran sa mga kongresista nga nangimbestigar sa extrajudicial killings (EJKs) sipsip kaayo ni Duterte sa una, gihangop sa publiko ang ilang pagbalitok ug, bisan uwahi na, pagpangita og mga paagi nga masilotan ang mga responsable sa EJKs.
Mas sakto si Acop nga ang kasipsip ni dela Rosa maoy nakahimo niyang hepe sa kapolisan ug dayon senador ug padayong nisaag niya paggamit sa Senado sa pagpanalipod ni Duterte imbes sa katawhan.
* * *
Mga sulti nilang Carpio ug dela Rosa ug ubang mga paukyab sa ilang kampo pulos gitumong sa paglingla sa katawhan nga ang ilang pamilya makaluluoyng biktima sa administrasyon. Ug busa mahimo bang mag-protesta sila, mas maayo ganing mag-people power aron pagpalayas ni Presidente Ferdinand Marcos Jr. sa Malakanyang.
Pero nagpabiling mingaw ang reaksiyon sa ilang mga dumadapig. Nagka-dyutay ang nanambong sa ilang Maisug rallies. Maong may sukaranan ang ilang kahadlok. Nga pipila ra sa ilang mga dumadapig ang mobaraw, mahimo gani nga mas daghan ang mo-abiba, kon ipadakop na sila sa International Criminal Court (ICC).
* * *
- Latest
