Rama gi-dismiss?

Kon tinuod man nga may hukom na ang Ombudsman sa kaso nga nepotism nga gipasaka batok ni Cebu City Mayor Michael Rama, giawhag sa mga abogado ni Rama ang Ombudsman kon nganong duna may mga tawo nga nag-una nga masayod niini?

Matud ni Atty. Collin Rosell, ang kanhi Cebu City administrator nga naapil sa pagkasuspenso ni Mayor Rama, nga mipadala na sila og suwat ngadto sa Ombudsman nga nangayo’g katin-awan kon tinuod ba ang gipalakaw nga tabi-tabi.

Matud ni Rosell nga sa usa ka panagtigum sa mga opisyal sa kabarangayan dinhi sa Cebu City pipila ka adlaw ang milabay, dunay usa ka opisyal nga nanabi nga gi-dismiss na si Mayor Rama sa Ombudsman kay napamatud-ang sad-an sa nepotismo.

Duna man gu’y mipasaka og kaso batok ni Rama kay kuno, ang mayor mi-hire sa duha ka igsuon sa asawa’s mayor sa lainlaing trabaho sa Cebu City government.

Bisan si Atty. Mikel Rama nga anak sa mayor, nagduda nga tsismis ra ug dili tinuod ang gipalakaw nga mga tabi sa usa ka opisyal sa Cebu City. Wa mobutyag ang mga abogado ni Rama kon kinsa kining opisyal nga nanabi nga gitaktak na ang mayor sa serbisyo.

Atol sa press conference, ang abogado nga anak ni Rama mipasabot nga ang duha ka igsuong lalaki ni Malou Mandanat, ang asawa ni Rama, dugay na nga nagtrabaho sa kagamhanan sa Cebu City.

Wa pa makabalik si Rama pagka mayor niadtong 2022 nga ang duha ka igsuon ni Malou, sila nagtrabaho na sa City Hall. Matud ni Atty. Mikel nga dili sab makiangayon nga abi kay naminyo na si Mayor Rama ug ang duha ka igsuon ni Malou, nga taktakon na lang sila sa trabaho.

Aw, huwaton lang nato ang hukom sa Ombudsman kabahin niining mao nga kaso. Pero kabahin sa mga hukom sa Ombudsman nga mauna pa pagkasayod ang publiko, posible gyud na.

Suma’ gud sa kaso ni Mandaue City Mayor Jonas Cortes nga gisuspenso sa Ombudsman og usa gyud ka tuig. Mga usa ka buwan pa sa wa pa madawat ni Cortes ang decision sa Ombudsman, duna nay mga tabi-tabi nga suspensohon siya.

Naa man gyud na kay kon ang kawani sa Ombudsman dunay mga suod kaayong amigo, dili man nimo kalikauyan nga matintal gyud siya pag-leak sa kasayuran.

Ang pagbutyag hinoon sa decision nga wa pa sa tukmang panahon, wa pa makadawat sa hukom ang mga “party” sa kaso, dili gyud na maayo.

Ako lang, dihang nadestino ko pagka court reporter kaniadto, dunay hukom sa usa ka huwes pagkonbikto sa usa ka akusado sa kaso, nasayod na ko daan usa ka adlaw sa wa pa ang promulgation. Ngano man? Suod nako ang usa ka kawani sa korte.