KoJC ray niunay
Sa wala pa ipakatap ang kapin sa duha ka libo ka mga polis ug mga sundawo sa compound sa Kingdom of Jesus Christ (KoJC) sa Davao City niadtong Agosto 24, nakaseguro nang ilang pangulo nga si Brig. Gen. Nicolas Torre III nga si Apollo Quiboloy nagtago sa sulod.
Wala nila igkita si Quiboloy sa unang girumbong building. Gisunod dayon pag-adto ang ikaduha nga nahibaw-ang tagoanan. Pero gibabagan sila sa kadagkoan sa KoJC. Maong mas nakumbinser nga sakto ang kasayuran nga nakuha gikan sa mga sakop ra sab ni Quiboloy.
* * *
Gipahibawo sa hepe sa Philippine National Police (PNP) nga si Heneral Rommel Marbil nga giselyohan nila ang tibuok 33 ka ektarya nga luna pinaagi sa pagdestino og gatosan ka polis nga walay laing trabaho gawas sa pagseguro nga masusi ug mailhan nila ang tanang nisulod ug nigawas sa compound.
Nakatabang ang kadagkoan sa KoJC sa pagpalig-on sa puntirya sa operasyon sa kapolisan. Kay matag higayon nga nipaduol ang silang Torre sa building nga gituohang tagoanan nanawag ang mga abogado ni Quiboloy ni Marbil aron paghangyo nga sabutsabotan ang posibleng pagsurender.
* * *
Pero walay surender nga nahitabo. Maong nakumbinser si Torre nga gilipat-lipat lang sila. Kaduha siya nipadangat og mensahe nga gipanghinaot nga makakumbinser ni Quiboloy nga natultolan na siya sa kapolisan:
Una, sa iyang press conference nga nagpahibawo nga natultolan nilang kuwarto ni Quiboloy nga gilibotan sa mga kuwarto sa mga babaye ug mga bata; ug
Ikaduha, atol sa hearing sa Senado niadtong Biyernes dihang iyang gi-detalye ang floor plan sa building nga giluklokan ni Quiboloy.
* * *
Sabado, Septiyembre 7, andam nang 500 ka sakop sa Special Action Force (SAF) ug 500 ka sakop Special Weapons and Tactics (SWAT) pag-atake sa ACQ College of Ministry ug silingan nga Jose Maria College (JMC). Tungod sa pangandam sa JMC sa bar exam, giuswag ang atake sa Domingo, Septiyembre 8.
Alas-10 sa buntag, gitawgan si Torre sa Crame nga mosurender si Quiboloy. Usa sa iyang mga kundisyon nga paapilon si Torre sa sabutsabot. Dihang gipakita siya sa press conference sa Crame niadtong Lunes, usa ka adlaw human siya nadakpi ug natanggong, gipabarug si Quiboloy sa, nakatag-an ka, kinadul-an ni Torre.
* * *
- Latest
