EDITORYAL - Suporta para sa atleta

Dili kaayo daghan, gamay ra gyud ang mapadalang atleta sa Pilipinas sa mga international sporting events ilabi na sama kadako sa Olympics. Kadto ra pud mga duwa nga dunay potensiyal makadaog ang mga Pinoy athletes.

Karong mga panahona, adunay mga Pilipinong atleta nga nakig-kompetinsiya sa mga de kalibre sab nga mga atleta didto sa Paris sa nasud sa France sa gipahigayong Paris Olympics 2024.

Mao nga kun magpadala og atleta sama aning Olympics, hinashasan gyud sila ug kadto gyung mga nakapasar ug nikulit og rekord sa mga international sporting competitions ubos sa nagkalainlaing sports qualifying bodies sama sa FIBA (basketball), FIFA (football), IBA (boxing) ug daghan pang uban.

Sa laktod, kaning mga gipadalang atleta sa Pilipinas dili sab kini basta-basta lang, kaparehas sab sila og giagian sa mga de kalibreng atleta nga nagrepresentar sab sa ilang mga nasud. Anhi lang nagka-deperensiya sa kalidad sa mga coaches, pasilidad, ug sweldo ug pinansiyal nga suporta para sa mga atleta ug sa tibuok coaching staff. 

Gagmay ra og sweldo ilabi na sa mga coaches, mao nga daghang mga Pilipinong coaches nga didto nangempleyo sa abroad, nag-train og mga atleta sa laing nasud nga morepresentar kanila didto sa mga international tournaments hangtud sa Olympics.

Dinhi sa Pilipinas, gawas sa naandang pahalipay gikan sa gobiyerno ngadto sa mga nakadaog nga mga atleta, dali kaayong mopagawas og kwarta ang mga pribadong sektor ilabi na ang mga negosyante para kanila.

Apan klaro kaayo nga gusto lang sab nilang sakyan ang pagsikat aning mga atleta karon.

Pahalipayan sila taman, sa ngalan kuno sa dungog nga gihatag sa mga atleta para sa Pilipinas apan dungan sab niini ang pagpa-promote o pagpa-endorsar sa ilang negosyo o produkto.

Hain man ni sila sa dihang nagsugod pa kining mga atleta, sa panahong nagkinahanglan sila og allowance, uniporme, pangbayad og de kalibre coaches, o bisan nalang suporta sa national coaches ug uban pa?

Maayo unta kun suportahan sab nila kining mga batang atleta nga nagsulbong palang diha sa mga grassroot program.

Kay makatabang kini nga modaghan pa ang mga atletang morepresentar sa nasud sa mga international competitions ilabi na sa Olympics sa mosunod nga mga katuigan.