Unsay ganahan ni Inday Sara
Fan ko sa ‘24.’ Kay ang bida nga si Jack Bauer (Kiefer Sutherland) may mga eksena nga nakapatay og terorista o duha sa kada ginhawa. Sa 204 ka episodes sa siyam ka seasons gikan sa 2001 hangtod sa 2014. Mao nay rason nganong nitan-aw ko sa ‘Designated Survivor’ sa 2016.
Nahugno hinuon kog diyutay. Kay bisan si Kiefer gihapon ang bida wa na siya makigpinusilay sa mga terorista. Aksidente nga na-presidente dihang gibombahan ang State of the Union ug napatay ang tanang opisyal gawas niya nga gipatago isip designated survivor.
* * *
Wa kong kahibawo kon si Bise Presidente Sara Duterte Carpio nga 23 anyos dihang nagsugod ang ‘24’ ganahan na ba sa salidang pinusilay gawas sa boksing. Ambot kon ‘Designated Survivor” na bay naabtan kay mas sayon nga nakit-an sa Netflix dihang 38 anyos na siya.
Wa gani kong kaseguro kon unsay iyang nakit-an–ang orihinal ba nga TV series o ang South Korean remake nga gisalida sa Netflix sa 2019. Pero nadani gyod tingali sa talagsaong kahigayonan nga dunay wa paabota nga makapuli sa labing taas nga katungdanan sa nasud.
* * *
Ambot duna ba siyay ideya nga ang pahibawo nga di motambong sa SONA karong Hulyo 22 ug pagtudlo sa iyang kaugalingon nga designated survivor makapa-ukay sa iyang politikanhong mga kaatbang. Ambot nakatugkad ba sa implikasyon sa iyang gipanulti.
Hinaot nga wa siyay mas makapa-ukyab nga giplano. Hinaot nga nagkomedya lang. Hinaot nga sakto ang iyang amahan nga siya ang niliwat sa kanhi presidente sa kamahiligon sa pagpanungog aron paglibog sa iyang mga kontra.
* * *
Ang ‘Designated Survivor’ wa kaambas sa kalamposan sa ‘24’ tungod sa kakuwang sa aksiyon. Wa ganahi ang fans ni Jack Bauer nga sige lang siyang istorya. Ang unang season ray giisip nga lahi kay way laing series nga susama og plot.
Ang ikaduhang season gisaway nga igo na lang nangopya sa mas popular nga TV series nga ‘West Wing’ parte sa inadlaw nga mga gimbuhaton sa White House. Ang ikatulong season gihulagway nga nisuway pero napakyas pagkopya sa ‘House of Cards’ nga puno sa politikanhong intriga ug panimawos. Mao tingali rason nga si Inday Sara mas ganahan sa binombahay sa unang season.
* * *
- Latest
