Panahon na sab sa "balimbing"

Kay katungod lagi kuno sa publiko ang masayod hinungdan nga bisan ubos sa unom ka buwan nga preventive suspension, mihimo si Mayor Michael Rama og iyang kaugalingon nga state of the city address.

Uban ang pila ka lugas nalang niyang mga alyado sa konseho ug mga sakop sa Garbo Asenso Sumbanan Alyansa (GASA), ang grupo sa mga street vendors dinhi sa syudad nga gipangulohan ni Maria Pino, gibatbat ni Rama didto sa Casino Español ang iyang mga nabuhat sa wala pa siya masuspenso.

Apan di gyud matago ni Rama ang naghingapin nga kahiubos ngadto sa iyang kaalyado nga si acting Mayor Raymond Alvin Garcia.

Ang iyang gitawag nga "Backstage" SOCA nasentro sa pag-alkontra sa lehitimong SOCA nga gihimo ni Garcia atubangan sa konseho sa dakbayan.

Ug kun nakabantay mo gibiyaan na si Rama sa iyang mga alyadong konsehal. Sa kadaghan nila nga naglangkob sa mayoriya, bugtong si Philip Zafra ug acting Vice Mayor Dondon Hontiveros ray miduyog ni Rama sa mga regular nga membro sa konseho. Didto hinuon ang ex-officio member nga  si SK Federation President Rhea Mae Jakosalem.

Klaro na ang linya diha sa konseho. Nahilis na ang partido Barug ni Rama sama sa inanay nga pagkahilis sa kaniadto dominanteng Bando Osmeña Pundok Kauswagan.

Ug di ko mahibulong nganong kalit milig-on pagbalik ang partido KUSUG ni Garcia. Hapit na ang eleksiyon og season na sab sa "balimbing".

Bisan wa pay opisyal nga deklarasyon, apan klaro pas udtong tutok nga wa nay Rama-Garcia tandem nga mahitabo ug hingpit nang nabungkag ang alyansa sa ilang mga partido.

Kun di motras si Rama sa iyang plano nga mopapili pag-usab pagkamayor sigurado ang ilang panagbagat ni Garcia.

Ang pangutana kinsa may ilang mga pares? Mitimaw ron ang posibilidad nga si Rama ug Hontiveros maoy magtandem. Dili sab layo ang posibilidad nga si Garcia ug si MCWD chairman Joey Daluz III ang magpares.

Usa ka butang hinuon ang sigurado, labihan ka alegre sa politika dinhi sa dakbayan sunod tuig nga eleksiyon.

Laing posibling mokandidato pagkamayor mao si ABC president Franklyn Ong ug naa sab si kanhi Customs commissioner Yogi Ruiz ingon man usab ang manok sa BOPK nga si konsehal Nestor Archival.