EDITORYAL - Kuwang ra ang Oratio Imperata

Ang Catholic Bishops of the Philippines nanawagan karon sa mga Filipino sa pag-ampo aron tabangan nga makalahutay aning nagkagrabeng kainit sa panahon dala sa El Niño pinaagi sa paglitok sa espesyal nga pag-ampo o Oratio Imperata.

Ang tumong matud pa sa maong orasyon mao ang pagpangayo sa Kahitas-an og uwan ug pakubsan ang nagkataas nga temperatura nga nasinati karon sa nasud.

Ang grabeng kainit nga nasinati dala aning El Niño gikatahong nagmugna na og P5.9 billion nga kadaut ngadto sa mga umahan sumala pa sa Department of Agriculture. Ang mga Obispo mimando sa tanang parokya sa paglitok sa oratio imperata ini og human sa Santos nga Misa. Tungod sa naglagiting nga kainit sa panahon, napugos ang halos tanang mga eskuylahan sa Pilipinas nga dili magklase sudsa duha ka adlaw sa miaging semana.

Ang mga eskuylahan nibalik sa modular learning ug online classes sama sa gihimo atol sa pandemiya tungod sa grabeng kainiton sa panahon.

Apan Balaang Kasulatan nag-ingon nga “Lihok tawo kay Akoa kang tabangan.” Duna say pagtulon-an sa Bibliya nga nagtudlo nga kinahanglang dili tanan isalig sa pag-ampo kondili molihok gyud aron ang giampo makab-ot.

Sa kaso dinhi sa Pilipinas, kuwang kaayo hangtud karon sa pagseryuso ang mga tawo ilabi na ang gobiyerno sa pagpatuman sa mga lagda ug mga balaod sa pagprotihir sa kalikupan. Daghang mga balaod nga namugna, apan kutob ra sa papel. Wala moseryuso bisan kadtong mga tawong gisuholan sa gobiyerno pagpatuman aning mga balaora. Nagpasulabi gyud ang pangwarta sa tanang suok sa sosyodad sa Pilipinas, gikan sa gobiyerno, lokal man o nasyonal; mga negosyante ug mismo ang populasyon wala magtagad sa kalikopan.

Ebidensiya niini ang mga natipun-og nga basura gikan sa yuta ngadto sa kasapaan hangtud sa kadagatan. Mga reclamation projects, paturagas nga pag-isyu og mga permits bisan klaro ng maguba ang kalikopan, illegal logging, land conversions,  mga minahan, mga landfills nga wala motuman sa mga environmental laws ug ang nagmika nga law enforcers pagpatuman sa mga balaod.

 Ang pag-ampo maayo, apan kun ang tawo dili molihok gamit ang tanang kahimanan ug kaalam nga gasa gikan sa Kahitas-an dinhi sa yuta nga magamit aron masolusyonan ang problema, wala gihapon kini bili.