Wa gyud ko masayop

Giaprobahan ni Mayor Michael Rama ang akong rekomendasyon nga magbutang mi og representante sa mga truckers diha sa Cebu City Traffic Management Board.

Ang presidente sa Visayas United Truckers Association, Inc. (VUTAI) nga si Israel Alin maoy bag-ong sakop sa Cebu City Traffic Management Board, ug kon wa si Alin, mopuli kaniya si Jun Cubarol.

Nahunahuna man gud nako nga nindot kon may representante ang mga trucker sa Traffic Management Board kay usahay ang ilang sektor makamugna og grabeng problema sa traffic, ilabi na kon may truck nga maaberiya diha sa viaduct, o kaha sa tunnel sa plaza Independencia

Tuod man, mipasalig sila si Alin ug Cubarol nga ang ilang kahugpongan motabang gyud kon may mga dagkong truck nga maaberiya aron nga makuha dayon ug dili makamugna og grabeng problema sa traffic.

Gani sa miting namo sa Traffic Management Board kaniadtong Martes, misaad si Cubarol nga ang ilang grupo mohatag og upat gyud ka heavy duty nga jack (550 tons) ngadto sa Cebu City Transportation Office.

Akong napanglantawan nga dili na masubli kadtong hitabo nga may naaberiya og alas dos sa kadlawon ug naabtan kini hangtud sa alas 10 sa buntag usa kini makuha gikan sa viaduct nga nakamugna og grabeng problema sa traffic.

* * *

Mapriso gyud diay ang rapper-singer nga si Range999 kay murder man ang ipasakang kaso sa kapolisan batok kaniya human mamatay ang Amerikano nga iyang gipusil.

Nahibawo na baya ta nga basta murder, way piyansa nga gitugot para sa temporaryong kagawasan sa usa ka akusado, nagpasabot nga mapriso gyud si Range999 samtang husayon pa ang iyang kaso.

Aw, maayo hinuon kay alegre ang prisohan kay dunay rapper-singer. Ang tinuod, wa gyud ko makaila niining Range999, kay di gyud ko mamati og mga kanta nga susama sa iyang pagakantahon.

Dihang nakontrobersiya na siya kay nakapusil, misuway ko pagpamati sa usa niya ka kanta, wa nako tiwasa kay wa kini makakuha sa akong pagdayeg.

Ang leksyon niining nahitabo kang Range999, kon ikaw gusto nga magtinil og armas, kompletoha gyud ang dukomento aron nga kon magamit nimo ni, basin makarason ka nga self- defense.

Mao gyud ni ang rason nganong kanunay ko magdala og bunal, kay kon mag-ungaw sa kakuyaw ang akong kinabuhi, duna ko y magamit kay tinudloan man ko sa usa ka amigo nako nga sakop kaniadto sa Doce Pares.

Unsaon nga duna unta ko y LTOPF, kun License To Own and Possess Firearms, pero wa man modayon ang misaad nga mohatag unta nako og armas.