Kontraktor nga abusado

Pipila ka mga kontraktor sa mga telecommunications companies ipatawag sa Cebu City Traffic Management Board atol sa ilang miting karong Martes, sunod semana.

Ang katuyoan sa pagpatawag kanila aron pasabton sila sa nahimo nilang sayop, ug maisip gani nga pagpangabuso ngadto sa katawhan sa paghimo nila sa ilang proyekto.

Makita man gud nga adunay mga lungag nga gikutkot ang mga kontraktor sa mga telcos nga wa dayon mahuman, ug gitabonan ra nila og nipis nga puthaw.

Tungod sa kanipis, inig-agi sa sakyanan, mosibog ni ug makita na ang lungag nga kuyaw kaayo nga mabuwasot na ang mga moagi nga mga motorista.

May uban pa gani nga kontraktor nga igo lang nilang tabonan og kahoy ang mga lungag nga peligro gyud kaayo nga makamugna og aksidente.

Unsaon, ang kadagkoan sa DPWH ug DEPW wa man sab magtagad nga kon makita nila nga dunay mga binuang nga trabaho ang mga kontraktor, tawgon dayon nila ang atensyon sa hingtungdang kontraktor.

Ang mga sakop na man hinoon sa Traffic Management Board nga wa magdawat og sweldo gikan sa kagamhanan maoy nagpakabana, samtang sila nagpakabuta-bungol lang.

Sa ako na nga giingon, kinahanglan unta nga ang mga engineering district sa DPWH magmugna gyud og team nga mosuroy sa mga karsada og sementohon/aspaltohon nila ang mga libaong.

Diri sa Veterans Drive unahan sa Marco Polo Hotel, lapad kaayong bahin sa karsada ang pwerteng daghana nga libaong apan gipasagdan ra kini sa DPWH.

Ang DEPW sab wa makaatiman sa mga libaongon nga karsada dinhi sa siyudad nga daghan man unta og aspalto ang kagamhanan sa dakbayan.

Magpasabot kini nga dili gyud sila seryoso nga mangalagad sa katawhan.

* * *

Nangreklamo ang mga tagdumala og pribadong mga tunghaan sa gisugyot nga balaudnon nga magdili kanila pagpatuman og “No permit, No exam policy.”

May mga tagdumala man gud og tunghaan nga dili nila tugotan nga maka-take og examination kadtong mga tinun-an nila nga dili makabayad sa tuition fees.

Sensitibo kaayo kining maong isyu ug angay'ng ayuhon kini pagsulbad. Angay’ng kaloy-on ang mga tinun-an kang kansang mga ginikanan dili dayon makabayad sa tuition sa ilang anak.

Apan samtang angay’ng dawaton ang promissory notes, kinahanglang dili sab kaayo dugayon ang pagbayad.

Lisud baya pud sa mga tagdumala og tunghaan kay mosweldo pa baya sila sa mga magtutudlo, ug magbayad pa sila sa kuryente ug ubang obligasyon.

Kinahanglan nga maayo gyud nga mo-budget ang mga ginikanan aron nga magahinan nila kanunay ang bayad sa tuition fees sa ilang mga anak.