Alingisig sa politika

Bisan sa nagpadayong pandemya ang kaalingisig sa politika dili na mapugngan.

Kini tungod kay eleksiyon na sab karong Mayo sunod tuig. Gani lima ka buwan gikan karon magsunod na ang filing of certifcate of candidacy alang sa mga buot mopapili og pwesto sa gobyerno.

Basi sa calendar of activities sa Comelec, gitakda ang filing sa COC sugod Oktubre 1 hangtud sa 8.

Sa Septembre magsugod na sab ang mga party conventions aron pilion kinsay ilang mga kandidato.

Busa dili ikatingala kun taliwa sa nagpadayong pandemiya makabungog ang kisaw sa kawa sa politika.

Iyaiya ang gimik sa mga nagtinguha nga mokandidato. Naay mga kunohay way gusto apan sektetong nagpaluyo sa mga grupo nga kintahay nag-awhag nila sa pagpadagan. Ug duna poy mga grupo nga kunohay nagpaluyo ug nag-awhag og mga opisyal nga modagan sa mas taas nga pwesto apan nagpahipi ang dautang motibo.

Ang awahing survey sa Pulse Asia naghatag sa publiko og idiya kinsay posibling mga kandidato pagkapresidente ug bise presidente karong Mayo 2022.

Si Davao City Mayor Sarah Duterte, anak ni Presidente Rodrigo Duterte, nagsilbing frontrunner sa mga posibling sunod nga presidente sa nasud bisan sa iyang pagdikidiki nga mokandidato.

Naa pud si Bise Presidente Leni Robredo ug sila si Senator Manny Pacquiao, Bong Go ug bisan na si Manila Mayor Isko Moreno.

Gawas ni Robredo nga maoy labing taas nga opisyal sa oposisyon, ang uban posibli hinuon nga mo slide down pagkabise presidente diin usa sa lig-on nga contender ang presidente sa Senado nga si Tito Sotto.

Maayo og track record si Sotto isip Senador. Niining panahon sa pandemya sekreto siyang naglihok pagtabang sa katawhan pinaagi sa pagpalabang sa Bayanihan Bill nga naghatag og pundo isip ayuda sa mga naapektohan.

Ang moabot nga eleksiyon maoy barometro nakakat-on ba ang publiko og leksiyon sa pagpili og mga lider nga haum ug dunay igong kasinatian.

Ang mga kandidato sa umaabot nga piniliay, labi pa ang mga anaa na daan sa katungdanan, hukman sa mga botante basi sa nahimo nilang pagsanong sa krisis nga atong giatubang---kun nakatabang ba sila sa pagpagaan sa kalisud sa publiko o naghatag hinuon og dugang kalisod ug kahasol sa mga kabus.