EDITORYAL - Pitola ang kiatang bikers

Bisan nalangay ug ang uban hinay gihapon pagsanong , gituman na sa ubang mga local government units ang dugay na kaayong yangungo sa mga bikers nga mao ang pagbutang og “bikes lanes” alang sa luwas nilang pagbiyahe.

Sa nanglabay nga mga katuigan sa wala pa magbutang og bike lanes ang mga LGUs, daghang mga bikers ang nangaligsan sa mga sakyanan, niresulta kini sa kamatayon sa biker o pagkabalda tibuok nilang kinabuhi.

Tungod niini, ang mga organisadong pundok sa mga bikers (kasagaran mga atletang cyclists ug mountain bike enthusiasts) nagkahiusa paghangyo sa gobiyerno nga pabutangan og bike lanes ang kadalanan.

Dili lang mga atleta o bike enthusiasts ang nagkinahanglan og luwas nga bike lanes, tungod kay daghan sa mga ordinaryong tawo ilabi na mga mamumuo ang nagbisikleta na karon.

Apan karon nga duna nay pipila ka mga bike lanes maghinayhinay na sab unta og disiplina ang mga bikers sa ilang kaugalingon pagsunod sa mga lagda sa trapiko.

Sagad sa mga bikers nga nangadisgrasya mao kadtong iresponsableng mosagol sa agianan sa mga de makinang sakyanan. Mora og ilang gisalig ang ilang kinabuhi ngadto sa mga drayber sa dagkong trak inay nga sila maoy mag-amping sa ilang kaugalingon.

Dunay uban nga kalit lang mopatunga sa dalan nga dili mosinyas nga sila buot motapon sa pikas kilid sa karsada;  walay early warning lights o blinkers;  dili makita ang ilang gisul-ob kun gabii;  walay reflectorized stickers nga makaalerto sa mga sakyanan samtang layo pa sila; wala gani bisan nalang bike helmets; ug labaw sa tanan sama sa ubang mga motorista kinahanglan sab nilang mosunod sa traffic laws sa tanang panahon.

Karon nga duna nay bike lanes maayo unta magsugod na og tuman sa lagda sa trapiko ang mga magbisekleta dili sama og nakigpatentero sila kanunay sa kamatayon. Kinahanglang pitoln sa LGUs kining mga kiatang bikers.

Tungod kay dili lang kinabuhi sa biker ang naa sa peligro kondili hasta sab sa ubang motorista ug road users nga mapagan tungod sa ilang kakiatan diha sa kadalanan.