Type O

Sa una nakong pagtan-aw niining maong balita sa niaging semana, nakaingon ko nga basin fake news kini tungod lagi kay dili nako familiar ang website nga mi-published niini. Apan tungod sa nagkadaghang legitimate media outlets nga mipublikar niini, nakaingon ko nga real news gyud diay kini.

Matud pa sa balita, kadtong mga tawo nga adunay Type O nga klase sa dugo mas gamay kuno ang tsansa nga matakdan sa coronavirus disease o COVID-19. Mao kini ang migawas sa mga pagdukiduki sa mga eksperto.

Sa maong pagtuon, nga kon mo-transmit kuno ang coronavirus gikan sa tawo nga adunay Type A nga dugo ngadto sa tawo nga adunay Type O nga dugo, kadtong adunay Type O nga dugo aduna kunoy antibodies nga makasagbang sa virus.

Gani daghang mga pagtuon ang mikonpirma niini. Kining mga pagtuon didto gipahigayon sa Wuhan, China – diin nagsugod ang COVID-19 – ug sa Spain ug Italy. Kahinumdoman nga kining mga nasura adunay daghang kaso sa coronavirus.

Siguro makaginhawa og lawom kadtong adunay Type O nga dugo. Kini tungod lagi sa pagtuo nga dako ang tsansa nga dili sila mataptan niini. Ug basin baya kon daghan ang mokiat ug magsig og suroy kay lagi feeling kublan sila sa coronavirus.

Apan bisan unsa pa man ang blood type, angay lamang nga dili gayud mokumpiyansa ang matag usa. Angay mahisayran sa tanan nga walay usa nga pasayloon niining coronavirus disease nga mihasi sa kalibotan karon.

Walay kumo sa pagmatngon ug sa pagsunod sa lagda sa kagamhanan, ilabina sa pagsul-ob kanunay og facemask samtang anaa sa gawas sa panimalay, social distancing ug ang kanunay sa paglimpiyo sa panglawas.

Mao lamang kini atong dag-anan batok sa maong balatian. Kay kon pabilin nga magpakabuta-bungol kita sa mga pahimangno sa otoridad, nan padayon gayud ang maldisyon nga atong giatubang dinhi sa Sugbo mugna ning COVID-19.

Gani, ang nag-unang rason sa padayong pagsulbong sa mga kaso sa coronavirus disease dinhi mao ang pagkawalay disiplina sa uban nga yano lamang misalikway sa mga quarantine protocol. Kini ang hinungdan ngano nga kita ang epicenter sa maong sakit tibuok nasud. Dili kita angay magsalig atong type sa dugo ug sa kahimsog sa atong panglawas. Walay gipili ang COVID-19, bata man o tigulang.