EDITORYAL - Diskriminasyong wa sa lugar

Tinuod nga makahadlok ug nakahatag og dakong kahasol sa publiko kining sitwasyong bunga sa coronavirus pandemic sa kalibotan ug ilabi na dinhi sa Pilipinas.

Ang kahadlok nakamugna og kalagot ug kayugot sa uban batok sa gobiyerno, sa mga silingan ug bisan na gani sa mga biktima sa COVID-19.

Dinhi  lang sa Cebu City, aduna gyuy mga netizens nga ni-post gyud sa social media og dili panunglo ngadto sa mga residente sa Brgy. Luz nga karon adunay daghang mga nagpositibo sa COVID-19.

Ang usa nanawagan pa gani nga pamatyon ang mga residente sa maong barangay aron kuno masalbar ang katawhan sa siyudad.

Husto ba kana nga panghunahuna? Naghinobrang kayugot o desperasyon nga wala sa lugar? Kani nga sakit walay gipili, adunahan, kabus, brayt o bisan walay kinaadman mahimong biktima kun dili mag-amping.

Apan dili husto nga tunglohon ang mga nataptan sa maong sakit. Lisud kaayong pamatud-an nga ang mga nagpositibo tanan sa maong barangay mga gahi og ulo o nagpabadlong sama sa uban.

Busa dili maayo kining diskriminasyong gipahamtang ngadto nila. Kay kun tunglohon ug dili tabangan sama ra og gikondenar na sila ngadto sa kamatayon.

Dili unta makalimot ang tawo sa mga pulong sa Bibliya nga nag-ingon, “Ayaw paghukom kay ikaw pagahukman sab” (Mateo 7:1). Kinsa man guy ganahang masakit? Kinsa man sab kaha sa mga tawo karon ang wala gyud sukad makalapas sa enhanced community quarantine?

“He who is without sin among you, let him be the first to throw a stone at her” (John 8:7).

Kining tanang kayugot ug kasilag dili makaluwas gikan sa maong sakit. Ilabi na kun ang nanghimantay ug nanaway walay aksyong gihimo kutob ra sa baba o wala sa lugar ang pagbadlong.

Ang mas maayong buhaton, protektahan ang kaugalingong pamilya pinaagi sa pag-awhag sa tanang kabanay nga tumanon gyud ang quarantine ug likayan kadtong mga tawong gahi’g mga ulo sa  gawas hangtud mahuman ang ECQ. Walay luna ang diskriminasyon karong panahona. Mas maayong, sa kaugalingon palang sugdan na ang pagtuman sa mga gimando sa gobiyerno.