Gituyo paglangay ang mga pahibawo
Ambot nataligam-an ba lang kay nagkapuliki sa uban pa nilang gimbuhaton atubangan sa pagsulbong sa mga pasyente nga gidudahang natakdan sa Wuhan coronavirus nga kinahanglang ipahimutang sa mga tambalanan, quarantine facilities ug home quarantine, kaduha na nasakpi ang kadagkoan sa Department of Health (DOH) nga nilangay sa pagpahibawo sa katawhan sa labing mahinungdanong kasayuran:
• Ang pagka-positibo sa kagaw sa ikaduhang Chinese national nga maoy labing unang namatay sa Wuhan coronavirus gawas sa mainland China; ug
• Ang pagka-positibo sa kagaw sa ikatulong Chinese national nga ila nang gipagawas sa tambalanan.
* * *
Gipahibawo ni Dr. Celia Carlos, ang tagduma sa Research Institute for Tropical Medicine (RITM), nga nakaplagan nilang positibo sa Wuhan coronavirus ang 44 anyos nga lalaki, nga kauban sa labing unang natakdan sa kagaw nga 38 anyos nga babaye, sa buntag niadtong Sabado, Pebrero 1. Human sa pila ka takna, namatay ang pasyente.
Bisan sa kamahinungdanon sa kasayuran, naghuwat ang DOH hangtod sa udto sa Dominggo, Pebrero 2, una nipatawag ug niatubang sa mga sakop sa media. Matod ni Carlos ang kadagkoan sa DOH maoy nagbuot sa paglangay sa pahibawo.
* * *
Giangkon ni Health Undersecretary Eric Domingo nga nahibaw-an sa RITM nga positibo sa Wuhan coronavirus ang 60 anyos nga babayeng Chinese national niadtong Pebrero 3, Lunes.
Gisugo dayon nila ang kadagkoan sa DOH sa Sugbo ug Central Visayas sa pagsugod sa contact tracing sa mga tawo nga nakaduol sa langyaw nga niagi sa Sugbo paingon sa Bohol.
Tibuok adlaw sa Pebrero 4, Martes, nga nanubag si Health Secretary Francisco Duque III sa mga pangutana sa mga senador.
Apan wa siya maghisgot nga natino na sa RITM ang ikatulong kaso. Si Domingo nay nihimo sa pahibawo sa udto sa Pebrero 5, Miyerkules.
* * *
Labihang paspasa sa DOH nga nakapahibawo dayon sa media nga negatibo sa kagaw ang 5 anyos nga batang lalaki nga taga Wuhan nga nakaduaw sa Sugbo ug ang uban pang mga pasyente nga ilang gidudahan ug gi-quarantine.
Nanagana ba lang silang Duque sa pag-angkon nga duna na tay mga kaso sa Wuhan coronavirus kay di ganahang ma-alarma ang katawhan? O gituyo paglangay kay nahagba ang ilang pasalig nga epektibo ang ilang gipahimutang nga mga panagang?
* * *
- Latest
