Mga balud sa kadagatan

Gabii sugo sa kahinam nga mabugnawan ug nadani sa tingog sa mga balud sa dagat ako buot motampisaw. Nindot unta ang pamati apan ang kakusog sa hinampakan sa mga balud maoy nakapalukapa nako sa hilabihan nahikatawa ako-

Apan sa akong pagkawas maoy akong nasinati nga daw sa nagngutngot ang akong palad. Nakamatngon ko nga dunay samad sa akong palad tungod sa bato nga akong nagunitan. Gamay ra ang samad apan ang kahapdos daw nikuyanap gyud sa hilabihan.

Ang maong kasinatian nagdapit kanako sa paghinuklog ning mosunod:

1. Tinuod gyud ang panultihon nga ang tubig nga halawom hilom ug ang tubig nga mabaw kasa. Tingali kay padung na hunas mao nga nigimaw sa hinayhinay ang mga bato. Ang halawom nga hunahuna dili gyud makadaut ni makaangin sa uban sa peligro samtang ang mabaw nga panghunahuna maoy magdala og kasakit sa kinabag-an.

2. Ang tawong halawom mopinsar hilom nga molihok ug gani di man halos masinati ang ang iyang tingog apan ang iyang binuhatan maoy mosugid kun unsa siyang matanga sa pagkatawo. Samtang ang tawong mabaw og buot padayong magpasiatab sa iyang mga bakak ug butbot.

3. Ang tawong maalamon wala na magkinahanglan pa og pagdayeg ug pag-uyon ni bisan kinsa kay alang kaniya siya mismo paigo na. Ang tawong mabaw og panghunahuna ang magpunay lamang og pangita sa pagdason sa ubang tawo.

4. Ang tawong halawom ug paminsar tawong malinawon ug dili kaayo motubay sa mga sinultihang way hinungdan.Ang tawong mubo ra og panghunahuna mahimuot ra gihapon bisan sa mga pulong way hinungdan ug sa mga hilisgutan nga way kapaingnan.

Apan bisan pa niini mahinungdanon baya pud nga atong sination ang kababawan sa kinabuhi kay ning paagiha mahimong mas mobarato ang katawa ug dili mahimong seryoso ang kinabuhi kay ang kinabuhi nga sobra ang kaseryoso mamahimong boring ra pud kaayo.

Sa dihang akong gitambalan ang akong samad nakaingon ko sa akong kaugalingon nga dili gyud diay maayo nga magpasagad lang kay diha sa pagpasagad mamahimong daw sakit ang atong mahiagoman.

Hapit na matapus ang tuig mao nga tingali atong balansehon ang atong kababawan ingon man ang atong giladmon aron sa ingon mamahimong mas malinawon ang tanan alang kanato.

Matud pa daghan man tuod ang risgo nga atong subayon apan mas maayo nga ato na lang suwayan nga kita masamad kaysa pagmahay unya kita maanad