Ang sin of omission

Septiyembre 29, 2019: Ikakawhaag-Unom nga Domingo sulod sa tuig

Mga Pagbasa:   Am. 6;1-7/Sal. 146/

1 Tim. 6;11-16/Lk. 16;19-31

Kadaghanan nato nakadungog naman tingali sa gitawag natong Sin of Commission nga nagpasabot og pagbuhat sa dili angay nga buhaton ug daghan nato ang naningkamot nga maglikay niini. Sa laing bahin, dunay gitawag natong Sin of Omission ang sala nga nahimo tungod kay nagdumili kita sa pagbuhat sa kinahanglan natong buhaton. Ug kadaghanan kanato ning panahona ang nahiagom ning maong matanga sa sala. Kini tungod kay nahimo man kitang indifferent kun unsay anaa sa atong palibot ug naka pokus lamang kita sa atong kaugalingon lamang.

Mao kini ang nahitabo sa dato sanglit nahikalimot siya nga dunay linalang nga Laazaro ang pangalan ug anaa sa iyang ganghaan. Nakalimot siya nga kining tawhana nga nagkalisud nagkinahanglan diay sa iyang tabang.

Wa mamantala nga iyang gimaltrato si Lazaro ang bugtong sala ra gyud niya mao nga way siyay gihimo nga makatabang ning tawhana simply because wala siyay pakialam kaniya.

Sa atong kinabuhi mao kini ang atong hinumdoman nga unta maangkon nato ang pagkaalinggat nga kita mismo mga tawo ug angayang magpakabuhi diha sa natad sa kalambigitan.

Angay kitang moangkon nga ang atong kahingpitan kinahanglan atong angkunon diha sa atong pakiglambit sa uban sa paagi nga makahuloganon. Ang gipasabot niining makahuloganon mao man ang paghimo og pagtabang kanila nga nagkinahanglan dili tungod kay buot kitang mogawas nga mga maayo kondili mao kini ang tukma ug haom sa atong estado. Unta mamahimo kitang abli sa atong tagsa tagsa ka mga kasingkasing aron atong paharion ang kultura sa kalooy ug pagpakabana dili ang pag iya iya ug ako ako lamang.

Mapasalamaton unta kita sa tanang mga maayong butang nga atong nadawat gikan sa kahitas-an ug angayan lamang nga ato kining ipaambit ngadto sa uban. Kay pinaagi lamang sa pagpaambit niini maangkon nato ang tinud-anay nga kalinaw ug kalipay. Ang Dios manalangin sa mga tawong manggihatagon nga malipayon.