Ang kalainan

Sa ubang kanasuran, bisan na gani sa mga nasud nga ania ra sa Asya, sama sa China, Japan ug Thailand makita nga importante gyud kaayo ang pagmugna og infrastructure projects.

Kini sama sa paghimo og mga “skyways” kun karsada nga anha mag-agi sa ibabaw nga makadagan ang imong gisakyan nga walay hunonghunong paingon sa dapit nga gusto nimong adtoan.

Panagsa ra ko nga maka-travel sa ubang kanasuran apan abtik ko nga motan-aw sa mga butang nga angay’ng sundogon nato dinhi sa Cebu aron molambo ang atong dapit.

Ang karsada sa Thailand, pwerteng lapara gyud nga dunay uban nga moabot gani og 30 metros, walay labot sa mga lapad sab kaayong skyways.

Ang ilang skyway tag-tulo ka lanes sa usa ka direksyon ug buwag ang skyway sa mga magsugat nga sakyanan aron paglikay nga kon may disgrasya dili kaayo dako ang epekto.

Unta, kon moabot ang higayon nga adunay mga infrastructure projects nga pagamugnaon, dili na unta supakon sa atong mga opisyal kay gitumong kini aron paglambo sa atong siyudad.

Apan unsaon man gud nga ang ubang opisyal moingon man dayon nga maguba kuno ang “historical value” sa atong dapit ug daghang balay patigayon nga nahimutang duol sa pagahimoong flyover nga apektado sa pagmugna og infrastructure project.

Hisgotan pa nato kini pagdugang unya sa sunod nato nga mga lindog.

* * *

Bahin sa habal-habal, didto sa Thailand, may habal-habal man sab. Ang nakalahi didto ug kini angay’ng sun-on dinhi, mao nga ang ilang mga habal-habal didto, may mga ID nga anaa gipapilit sa likud sa ilang uniporme.

Dili ba nindot tuod nga sun-on dinhi sa ato nga ang mga habal-habal pasul-obon gyud og mga reflectorized vest, unya may ID sa likud.

Ang mga mosakay sa habal-habal makaila kon kinsa ang driver sa motor nga ilang gisakyan nga kon may abuso, sayon ra alang kanila ang pagreklamo.

* * *

Nahibaw-an nako nga si mayor-elect Edgardo Labella mokuha gyud og mga sinaligan aron tugyanan pagdumala sa mga departamento sa Cebu City government kon mosugod na siya paglingkod sa katungdanan sugod karong Hunyo 30.

Dili diay tinuod nga kadtong mga suod kaniadto ni vice mayor-elect Michael Rama dihang siya pa ang mayor, mao ra usab ang modumala sa gihuptan nilang pwesto kaniadto.

May usa man gud ka tawo nga misuroy na kuno sa opisina nga gidumala niya kaniadto.

Buyno, angay’ng mangita gyud si Labella og mga tawo nga sinsero moserbisyo ug wala lang mag-apas sa dagko kaayo nga sweldo pagka department head. Paabuton nato kon kinsa ang ipanudlo ni Labella sa maong mga pwesto.