Sayop nga mga tambag
Sa makausa pa, napamatud-an na sab ang kadako sa sayop sa mga magtatambag sa ekonomiya ni Presidente Rodrigo Duterte.
Tungod sa ilang tambag, gihinayon pagpahamtang ang ikaduhang hugna sa excise tax sa mga produkto sa lana karong tuiga.
Nga gisuspenso unta sa presidente tungod sa pagsulbong sa presyo sa lana sa niaging tuig.
Apan nipasalig ang economic managers nga magpadayon sa bag-ong tuig ang pagtidlom sa presyo sa lana nga nagsugod sa Oktubre sa niaging tuig. Tuod man, pagsugod gyod sa 2019 nilumpayat dayon ang lana sukwahi sa ilang pangagpas.
* * *
Sugod sa Enero 1, 2019 hangtod sa niaging semana, mao na ni kadako ang kinatibuk-an nga uminto sa mga produkto sa lana tungod sa exicse tax ubos sa Tax Reform for Acceleration and Inclusion (TRAIN) Law ug sa pagsulbong sa presyo sa lana sa merkado sa kalibotan:
P8.34 sa matag litro sa gasolina;
P6.89 sa matag litro sa krudo; ug
P4.95 sa matag litro sa kerosene.
* * *
Di pa na mao. Sa ikapitong sunudsunod nga semana, mosaka na sab ang presyo sa mga produkto sa lana ugma sa sayong buntag. Niang banabana sa mga eksperto sa industriya sa lana, nga mas tukma kay sa mga eksperto sa Malakanyang:
Mosaka ang presyo sa gasolina og P0.65 ngadto sa P0.75 matag litro;
Mosaka ang presyo sa krudo og P0.05 ngadto sa P0.15 matag litro; ug
Mosaka ang presyo sa kerosene og P0.05 ngadto sa P0.15 matag litro.
* * *
Nagsugod na og takod ang mas mahal nga lana ngadto sa plitehan sa mga sakyanang pamasahero ug sa presyo sa nag-unang mga palaliton.
Sa nangaging mga higayon, ang mas mahal nga lana gisakyan sa mapahimuslanon nga mga negosyante sa pagpasamot sa pagpaburot sa ilang ginansiya.
Ambot unsay dangatan ining nasura kon padayon ang presidente nga maminaw sa iyang mga magtatambag.
Nga kon wa mamakak nagsige lang og kasayop sa ilang mga pangagpas. Manghinaot ta nga ang usa sa labing pagarpar nila, si kanhi Budget Secretary Benjamin Diokno, mas kamao nang mokuwenta og mga numero sa iyang bag-o ug mas taas nga katungdanan sa pagka gobernador sa Bangko Sentral ng Pilipinas (BSP).
* * *
- Latest
